MySpace për një muaj fitoi një milion shfrytëzues të rinj

MySpace ka kohë që është duke humbur betejën me disa rrjeta të reja shoqërore siç janë Facebook dhe Twitter, por ende po tërheq një numër të madh të shfrytëzuese të rinj, së paku sipas shifrave të cilat vet kompania publikoi të hënën.

Siç shkruan Mashable, në MySpace thonë se në rrjetin e tyre për çdo dit regjistrohen rreth 40 mijë njerëz, dhe se për vetëm një muaj, pas nisjes së MySpace Music Player në muajin dhjetor, kanë mbledhur më shumë se një milion shfrytëzues të rinj.

Në deklaratë gjithashtu thuhet se MySpace tani ofron më se 42 milion këngë dhe se ka koleksionin më të madh të muzikës pa pagesë në botë, me cilën gjë bën me dije se MySpace nuk dëshiron më të krahasohet me rrjetat shoqërore, por me shërbimet siç është Spotify.

Orientimi i ri nuk do të duhej të jetë ndonjë befasi, duke pasur parasysh se njëri nga pronarët e MySpace nga qershori i vitit të kaluar është edhe pop-ylli Justin Timberlake. A është duke e pritur rrjetin shoqërorë i cili në fillim të vitit 2011 në një muaj humbi 10 milion shfrytëzues, një e ardhme tjetër e re, mbetet të shihet. /Telegrafi/