Në Panasonic Convention 2011 e pranishme edhe PCWorld Albanian

Duke filluar nga data 14 shkurt e këtij viti në qytetin e bukur të Londrës së Britanisë së Madhe, Panasonic do të mbaj kongresin e saj të quajtur “Panasonic Convention 2011” në kuadër të së cilit do të prezantojë linjën e saj të produkteve, duke filluar prej sistemeve të argëtimit e deri tek pajisjet portabile.

Ashtu si edhe vitin e kaluar edhe këtë vit pritet të marrin pjesë një numër i madh i të ftuarve si në nivelin e medieve ashtu edhe në nivelin e partnerëve tregtar, por e veçanta e këtij viti është se atje do të jetë edhe një përfaqësues nga mediet e Kosovës, përkatësisht kryeredaktori i mediumit PCWorld Albanian, Çelik Nimani.

“PCWorld Albanian e nisi punën e saj në qershor të vitit 2008 duke sulmuar dy tregje në të njërën kohë, Kosovën dhe Shqipërinë dhe realisht nga ajo kohë deri më sot është punuar jashtëzakonisht shumë për të mbuluar një fushë të tregut të cilën asnjë medium nuk e ka bërë deri më sot. Sektori i teknologjisë informative me punën e bërë nga PCWorld Albanian ka arritur që të kalojë në një fazë të rëndësishme ndërsa në kthim partnerët tanë vendor e ndërkombëtar, përfshirë këtu edhe Panasonic-un kanë respektuar vazhdimisht ndikimin tonë. Falë kësaj sot kemi rastin që të jemi pjesëmarrës në Panasonic Convention 2011 dhe të përcjellim nga afër zhvillimin e ngjarjeve atje” u shpreh z. Nimani për telegrafi.com. “Gjithsesi duhet falënderuar përfaqësuesin regjional të Panasonic-ut për tregjet e Kosovës, Shqipërisë dhe Maqedonisë, Adrijan Alija që kanë qenë shumë konstruktiv me ne e gjithashtu edhe përfaqësuesit tjerë nga Panasonic të cilët mundësojë praninë e PCWorld Albanian në Londër”.

Çeliku do të jetë në mesin e 10 gazetarëve nga Ballkani që do të përcjellin zhvillimet pranë Panasonic Convetion 2011, dhe njëkohësisht është i vetmi gazetar shqiptar nga Kosova apo Shqipëria, kurse të tjerët janë kryesisht nga Serbia, Kroacia, Sllovenia, Maqedonia, etj.

PCWorld Albanian është medium i licencuar nga IDG që botohet në Kosovë e Shqipëri përmes kompanisë ITBM Group, ndërsa kjo e fundit ka lansuar në këto dy tregje edhe një medium tjetër që mban emërtimin “CIO.al”, dhe që gjithashtu është markë e regjistruar nën emblemën e IDG-së.