Ndalesë për HTC-në në Amerikë?

Komisioni ndërkombëtar për tregti ka marrë vendim për ndalesën e telefonave të caktuar të HTC-së në Amerikë, e në bazë të padisë të cilën e ka ngritur Apple.

Ndalesa do të filloj të zbatohet me 19 prill, transmeton Associated Press, ashtu që operatorët të kenë kohë që të adaptohen, e HTC do të ketë mundësi të ju ofroj shfrytëzuesve telefonat e riparuar në rast se ka nevojë për zëvendësim. Vendimi ka të bëjë me telefonat të cilët përdorin patentën për të cilën komisioni Ndërkombëtarë ka konfirmuar se është në pronësi të Apple.

Apple padinë në të cilën thotë se HTC pa leje po i përdor disa patenta të tyre e dorëzoi në prill të vitit 2010, por duhet cekur edhe se komisioni i përmendur padinë e Apple nga katër e ka zbritur në vetëm një patent.

Për momentin nuk dihet cilët telefona të HTC-së do të ndalohen, e nga HTC në deklaratën zyrtarë kanë thënë se në pyetje është patenta e cila ka të bëjë me një pjesë të ndërfaqes për shfrytëzues, dhe se ajo pjesë së shpejti do të largohet nga pajisjet në të cilat ndodhet.

BBC shkruan se bëhet fjalë për teknologjinë e quajtur “data tapping”, e cila ia mundëson shfrytëzuesve që me tap (prekje-klikim) të numrit ose adresës nga emaili, për shembull, të thirret menjëherë ai numër ose të gjendet adresa në hartë.

Për agjencinë Reuters nga HTC është thënë se vendimi i këtillë është në të vërtetë fitore, për shkak se ka të bëjë vetëm me një patentë, në vend të dhjetë, për sa bëhej fjalë në fillim.

Pjesa më e madhe e analistëve pajtohet se vendimi i këtillë në masë minimale do të çrregulloj afarizmin e kompanisë HTC në Amerikë. /Telegrafi/