Samsung – Apple, padi e re

Kompania Samsung Electronics parashtroi një padi të re kundër kompanisë Apple në Gjermani, duke pohuar se Apple pa leje përdor katër patenta të saj.

Padia është parashtruar me 16 dhjetor, kanë konfirmuar sot nga Samsung për Wall Street Journal, e zëdhënësi i kompanisë tha se patentat e Samsungut pa leje ishin përdorur në iPad 2, iPhone 4 dhe 4S.

Agjencioni AFP, shkruan se patentat kanë të bëjnë me ndërfaqen e shfrytëzuesve dhe teknologjinë për telekomunikim.
Gjermania është një nga vendet në të cilin kontesti i mëhershëm në mes të këtyre dy kompanive, kishte përfunduar në favor të Apple-it. Është ndaluar shitja e Galaxy Tab 10.1 mbi akuzat se ka kopjuar dizajnin e produkteve të Apple, e nga Samsung gjatë nëntorit kanë paralajmëruar produktin e ridizajnuar ashtu që tableti i tyre 10-inçësh të mund ti ofrohet prapë tregut gjerman.

Kompanitë tashmë janë të përfshira në një varg të padive në mbarë botën, e para dhjetë ditëve ka ardhur deri te zgjidhja e njërës prej tyre, Samsung sipas saj prapë ka të drejtë të shes tabletin e vet në Australi. /Telegrafi/