Më shumë se 18 milionë tablet janë shpërndarë vitin e kaluar

Apple së bashku me prodhuesit tjerë të kompjuterëve tablet kanë shpërndarë më shumë se 18 milionë pajisje të tilla gjatë vitit 2010, ndërsa këtë vit pritet që numri i tyre të shkojë në 50 milionë kopje të cilat do të jenë në dispozicion për shitje në tërë botën, thuhet sipas raportit të fundit të IDC’së.

Hulumtuesit e tregut thanë të enjten se Apple ka arritur të marrë 83 për qind të tregut gjatë vitit të kaluar, me tabletin e tyre të parë iPad.

Ndërsa këtë vit, pritet që Apple të mbajë 70 deri në 80 për qind të tregut, ndërsa prodhuesit e tjerë do ta rrisin pjesëmarrjen e tyre në treg.

Në tre-mujorin e fundit të vitit 2010, IDC pati raportuar se prodhuesit e tabletëve kishin shpërndarë më shumë se 10.1 milionë tablet në tregjet globale.

Rivali më i fuqishëm i iPad’it të Apple ishte tableti i Samsung Electronics – Galaxy Tab, i cili kishte marrë më shumë se 17 për qind të pjesëmarrjes së tregut në muajt e fundit.

Mirëpo, çmimi i lartë i këtij tableti kishte bërë që përdoruesit të mos jenë të interesuar në masë të madhe për këtë kompjuter tablet. / Telegrafi /