Modeli i ri i iPad në prodhim e sipër?

Supozohet se versioni i ri i iPad tanimë është në prodhim e sipër, mirëpo tani për tani nuk ka informata se kurrë do të vjen në treg dhe me çfarë çmimi.

Sipas raportimit të gazetës amerikane The Wall Street Journal, kompania Apple tanimë ka filluar me prodhimin e versionit të ri të kompjuterit të vet tablet – iPad.

Tableti i ri i Apple do të duhej të ketë procesor më të shpejtë dhe kamerë të integruar për video konferenca, mirëpo do të ketë ekran të rezolucionit të njëjtë si modeli i parë, pohohet në raportim.

Po ashtu theksohet se modeli i ri i iPad në Shtetet e Bashkuara të Amerikës do të duhej të shitet nëpërmes partnerëve ekzistues, respektivisht AT&T e Verizon Wireless, me të cilën gjë sugjerohet se do të mund të mbështeste të dy standardet konkurrente për rrjetet mobile, respektivisht GSM e CDMA. Mirëpo në raportim nuk ka informata se kur iPad i ri do të mund të gjendej në treg dhe me çfarë çmimi.

Si zakonisht, përfaqësuesit e Apple nuk kanë dashur të komentojnë këto thashetheme. /Telegrafi/