Opinione

Deri kur kështu…?!

Skandal pas skandali!

Para disa muajve shpërtheu skandali i stendave, pas raportimit të vdekjes së mbi 800 pacientëve, të cilët edhe pse kishin paguar me mijëra euro për vendosjen e stendave, stendat të ndjerëve nuk iu kishin vendosur fare dhe si pasojë këta persona të gjithë kanë vdekur pas disa ditëve, javëve apo muajve më vonë!

Askush nuk ka marrë përgjegjësi, dhe nuk u akuzua apo nuk u arrestua për vdekjen e këtyre njerëzve! Por, njerëzit e njëjtë që janë fajtorë për vdekjen e këtyre qytetarëve të Kosovës, vazhdojnë të punojnë pa i penguar askush deri më tash! Madje, ish ministri i Shëndetësisë, Ferid Agani, në vend se sot të ishte bashkë me dhjetëra të tjerë prapa grilave, për shkak të këtij skandali që shkaktoi vdekjen e mbi 800 personave, atë e shpërblyen me postin e ministrit të Planifikimit Hapësinor!

Çfarë po hamë ne? Po hamë krunde të lopëve që janë shumë të rrezikshme për shëndetin e njeriut, nga i cili mund të sëmuremi me kancer, leukemi dhe sëmundje të tjera të rrezikshme!

Lista e veteranëve, ashtu siç pritej nga të gjithë qytetarët e Kosovës, që do të stërfryhej nga matrapazët, edhe ashtu ndodhi! Në listën e veteranëve dhe invalidëve të luftës së UÇK-së, dolën më shumë se 26000 ”veteranë” dhe ”invalidë” të UÇK-së, e që të gjithë e dimë se vetëm 1/3 e tyre kanë qenë veteranë dhe invalidë të vërtetë të luftës së Ushtrisë Çlirimtare të Kosovës! E, shtatëdhjetë për qind të tyre që janë futur në listë pa qenë fare pjesëmarrës në luftën e UÇK-së, janë futur nga komandantët matrapazë që duan të vjedhin nga buxheti edhe ashtu i varfër i Qeverisë së Republikës së Kosovës!

Në anë tjetër një pjesë goxha e madhe e veteranëve dhe invalidëve të vërtetë të UÇK-së, nuk e kanë gjetur emrin e tyre në këto lista! Ku janë veteranët dhe invalidët e vërtetë të UÇK-së që nuk po reagojnë për këtë skandal, në mënyrë që të nxirren jashtë listës të gjithë matrapazët që duan të vjedhin nga buxheti i Kosovës ?! Pse po heshtin ? Pse nuk po reagojnë për këto pisllëqe të këtyre maptrapazëve?

Dhe, skandali më i freskët, është skandali me doganat e Kosovës, me futjen pa doganë të 10 kilogrami ari, skandal që paska gisht edhe Ambasada e Turqisë, e cila e pranoi që paska ndërhyrë për futjen arit në Kosovë! Çfarë shteti jemi kur edhe ambasadat e huaja bëhen pjesë e kontrabandës dhe krimit të organizuar?

Ku është shteti, ku është Qeveria, ku është opozita, ku është Parlamenti, ku është Prokuroria, ku është Policia e Kosovës, ku janë OJQ-të, ku është populli ? A mban përgjegjësi dikush në këtë vend, për gjithë këto skandale dhe tmerre? A mban përgjegjësi shteti për jetën e qytetarëve të vetë? A ka shtet ky vend, apo vetëm pushtet për të ushqyer një grusht njerëzish që tash e gjashtëmbëdhjetë vite, e kanë bërë këtë vend vatër të krimit të organizuar dhe parajsë për hajdutët, banditët dhe kriminelët të politikës dhe parapolitikës?