Nuk na duan sepse jemi shqiptarë

Thonë që të mos hapim kutinë e Pandorës. Por, kush po thotë se kutia e Pandorës është e mbyllur!? Kush po fiton në emër të mbajtjes “mbyllur” të kutisë të kësaj Pandore?!

Pas dimrit të gjatë e të ftohtë, erdhi pranvera e freskët me të reshura frytdhënëse dhe me një paralajmërim se vera do të bëhet me të vërtetë mjaftë e ngrohtë. Por, mesa duket kjo pranverë i gjeti shqiptarët tejet të përgjumur duke dashur që edhe në këtë stinë të shenjtë të vazhdoj gjumin dhe mos të zgjohet që të shoh së çfarë po ndodh realisht.

“Fqinjët” tanë në mënyrë të koordinuar po luajnë lojën, ndërsa ne jemi bërë pre e provokimeve dhe atentateve të ndryshme që dita ditës po irritojnë shumë e më shumë popullin shqiptar që pafajësisht po bëhet kurban i interesave të “fqinjëve”. Të ta arrestojnë policin kufitar në vendin tënd, të të vrasin qytetar vetëm për arsye se me ngulm ka mbrojtur pragun e shtëpisë, të të rrahin në vendin tënd të lindjes, të të akuzojë terrorist pa të gjykuar… kjo është vërtetë e tepërt.

Ngjarjet e fundit që po ndodhin në shtetin pjellë të Titos, në Kosovë Lindore dhe në veri të Mitrovicës po shihet qartë se kuzhinat e Beogradit kanë ngritur plan dhe se nuk do të ndalin nëse edhe politika jonë nuk ka një reaksion ndaj aksionit të bërë. Gjithmonë duke na sulmuar ata kanë fituar dhe ne duke u mbrojtur gjithmonë kemi humbur.

Vriten dy qytetar të Gostivarit nga një polic “maqedon” për pikë të qejfit, ndërsa MPB në mënyrë të turpshme në fillim deshi që ta racionalizoj aktin e bërë, e mediat “maqedone” e minojnë këtë ngjarje.

Por, si bumerang vjen vrasja e pesëfishtë në Liqenin Smilkovës të Shkupit, ku i gjithë populli shqiptar u solidarizua me rastin dhe shprehi keqardhje si nga institucionet në Kosovë ashtu edhe në Shqipëri. Por, ç’ndodhi pastaj? Mediat “maqedonase” as që përmendin ngushëllimin e Kosovës dhe të Shqipërisë ndaj rastit dhe vazhdojnë interpretimet e njëanshme të tyre duke shkaktuar irritim të palës “maqedone”.

Ky nuk është fundi. Në emër “të gjetjes” së vrasësve ata terrorizojnë popullatën në rrethinën e Shkupit (gjë që s’është hera e parë) dhe e keqja më e keqes krijojnë një problem të pabërë duke të akuzuar si institucion (kujdes, MPB nuk ka të drejtë të gjykoj) si radikalist islam ish ushtarët e UÇK-së, të moshuar të gjashtëdhjetave dhe gra, gjithë këta të pafajshëm.

Partitë shqiptare mbyllin gojën dhe behën lodra të politikës sllave, duke harruar se këta janë zgjedhur si prijës të një populli që ua dha shansin që t’i përfaqësojë dhe t’i mbroj si di më së miri. Por, nuk po ndodh ashtu.

Neve shqiptarëve na sulmojnë vetëm se jemi shqiptarë e jo myslimanë. Pot të ishte ashtu, pse atëherë nuk po revoltohen dhe nuk po reagojnë turqit, boshnjakët, romët myslimanë ndaj ofendimit të fesë të tyre?!? Prandaj, ne vetëm përmes shqiptarizmit do të mbrojmë kombin tonë, gjuhën tonë dhe kulturën tonë. Mënyra tjetër e mbrojtjes vetëm se do të shkonte në disfavorin tonë dhe do të humbim shumë.

Për fund, atyre që në emër të idealeve të mëdha po realizojnë interesa të vogla personale: populli po ngulfatet dita ditës, po varfërohet shumë e më shumë, po rrahet, po burgoset e vritet në shtëpi të vet, po mbyllet e po izolohet nga të gjithë, e kjo ishte realizimi i politikave të juaja? Kjo është perspektiva evropiane të cilët na e ofrojnë?!