Opinione

Analfabetizmi politik

Është më se absurde të qëndrosh “gojëlidhur” e të mos flasësh të paktën një fjali, të reagosh, qoftë në shenjë përkrahjeje apo të kundërshtosh, karshi deklaratave skandaloze, të pamatura dhe tërësisht konfuze, nga dikush që përfaqëson shqiptarët e Luginës, fatkeqësisht në mesin e tyre edhe mua…

E fillova kështu këtë shkrim për të shprehur mllefin tim si një qytetar shqiptar, i këtij rajoni të banuar me shqiptarë. Rajon që me dekada është përdhunuar, diskriminuar, dëbuar, djegur, vrarë e çka nuk është bërë në te, nga zgjedha serbe. Fatkeqësisht një spirale e tillë vazhdon edhe sot falë analfabetizmit politik, fal pseudo patriotëve shqiptarë, që në çdo rast që u jepet bëjnë fushata paraelektorale, gjithnjë në dëm të interesave kombëtare e në favor fillimisht të strukturave të errëta dhe qeveritarëve serbë e pastaj edhe xhepave të tyre.

Zanafilla e reagimit tim nis nga emisioni Top Show, që u zhvillua ditë më parë në mediumin më prestigjioz shqiptar Top Channel, të Republikës së Shqipërisë, të titulluar “Lugina e harruar”, e ku të ftuar ishin përfaqësuesit e shqiptarëve të Luginës, ndër ta edhe kryetari i Komunës së Preshevës.

Jam shumë i indinjuar dhe kurrsesi nuk mund ta kuptoj, se individë të caktuar i japin të drejtë vetes të flasin në emër të interesave të shqiptarëve të Luginës. Është absurd i llojit të vet që një kryetar komune të flasë në emër popullatës shqiptare, kur mezi gëzon besimin e pesëmbëdhjetë përqindshit të tyre. Madje për sigurimin e kësaj përqindjeje, janë bërë kombinime çfarë kurrë më parë në rendin plural nuk janë shënuar në rajonin tonë. Ndonëse kjo është për një analizë tjetër, e cila sigurisht do të zbulonte mentorët e këtyre planeve që nuk ka dyshim se janë nga radhët e hijeve, që orkestruan gjithçka antishqiptare.

Por, t`i kthehemi debatit, qëllim i së cilit padyshim ishte ndërkombëtarizimi i çështjes së shqiptarëve të Luginës së Preshevës, kontribut që vëllezërit në Shqipëri dhe në Kosovë, nuk e kanë ndërprerë as edhe një herë, në forma të ndryshme. Debatit ku qenë ftuar ata që ishin pjesë e realitetit të përditshëm, madje përgjegjës të gjendjes së këtushme.

Vallë e dinin të gjithë qëllimin e këtij emisioni, apo ndoshta aty dikush kishte shkuar me detyrë të caktuar, mbase personalisht këtë dilemë nuk mund ta tejkaloj.

Ajo që më bën të mendohem është absurdi i kërkimit të tërheqjes së Ambasadorit të Republikës së Shqipërisë nga Serbia, në emër të një absurdi tjetër që assesi ta kuptoj, siç u tha Abetares së “bastarduar” shqipe e cila sipas kryetarit të Komunës së Preshevës, qenka ndryshuar nga Abetarja origjinale e Republikës së Shqipërisë. Kjo mbase i vë kapak të gjitha dilemave të mëtejme. Nuk ka dyshim se ky zotëri, as edhe një hap nuk e ka bërë që nxënësit shqiptarë të mësojnë me libra shqip nga Shqipëria, madje këtë gjatë tërë kohës e ka kundërshtuar duke shkaktuar edhe pengesa reale përmes rrugës së bojkotit të formimit të Këshillit Nacional të Shqiptarëve që administrohen nga Serbia. Këshill ky, që në bashkëpunim të ngushtë me Ambasadën e Republikës së Shqipërisë e veçanërisht Shkëlqesisë së tij Ambasadorit Çaushi, si dhe me përfaqësues diplomatikë të shteteve më të fuqishme siç është Ambasada Amerikane, ajo e OSBE-së dhe të tjerat, ka arritur që të bindë autoritetet shtetërore serbe, që më në fund të lejohet përdorimi i Abetares nga Republika e Shqipërisë.

Këtu do të ishte mirë që në aspektin moral të paktën, të mendohej paksa, po edhe sikur kjo Abetare në vete të përmbante tërësisht elemente sllave, a do të ishte mirë që të kundërshtohej për hirë të Shtetit Amë, edhe pse Abetarja përmban pothuaj 99 % elementë kombëtarë, përveç Flamurit dhe një emërtimi të një toponimi në shqiptim, jo Shkodër por Nish! PO a nuk e ndërroi Kosova flamurin e edhe himnin për hir të parimeve dhe rregullave ndërkombëtare, vallë aq analfabetizëm politik është prezent në këtë shtresë të njerëzve që kundërshtojnë çdo përpjekje! Është ngritur bujë, e pa nevojë, tentohet të minimizohet, për mua e arritura e shekullit – Lejimi i Abetares nga Republika e Shqipërisë për nxënësit shqiptarë, për fëmijët e mi, të tutë e edhe të këtij kryetari,… Po a ka kënaqësi më të madhe se kjo çështje, ata që tërë jetën ia kushtuan çështjes kombëtare, ata që e dinë rëndësinë e kësaj, sigurisht se e vlerësojnë këtë akt, këtë vepër madhore. Por, ata që janë mësuar t`i përvetësojnë rezultatet pa e qitur as edhe një pikë djerse në shërbim kombëtar, është fakt se e kundërshtojnë, tentojnë ta minimizojnë, madje edhe kërkojnë largimin e Ambasadorit.

Pas gati një shekulli të ekzistimit të shtetit shqiptar dhe mbase gjysmë shekulli të marrëdhënieve diplomatike të Shqipërisë me Serbinë, ishte Shkëlqesia e tij z.Çaushi, ai që organizoi ardhjen e zëvendëskryeministrit të Shqipërisë, Ilir Meta, në Luginë. Kjo mbase ishte kthesa e madhe e historisë më të re të shqiptarëve të këtij rajoni. Një qëndrim paksa ndryshe nga e kaluara e Serbisë ndaj shqiptarëve të Luginës.

Mbase ky person e meriton të jetë Qytetar Nderi i Luginës së Preshevës.

Por, ku mbeti roli i kryetarit aktual të Preshevës, në vazhdimin e angazhimit të tij për përmirësimin e gjendjes së shqiptarëve të këtushëm. Cilat janë veprat konkrete të këtij të zgjedhuri nga vetëm 15 % e trupit elektoral të shqiptarëve, premtimet për bashkim me Republikën e Kosovës, të cilët ia siguruan karrigen e njeriut të parë të Komunës në Preshevë, a u realizuan?-Ide këto që së fundi kemi rast t`i dëgjojmë nga presidenti serb Tadiq dhe zëvendëskryeministri Ivica Daqiç pasardhës i Millosheviqit.

Ku janë më se 500 vende të punës që dikur, premtonte t`i realizojë në projektin “Interspeed”, e që më vonë doli se nuk do ta lejonte së përfunduari, por që sot ekziston?!

Pse vallë nuk hapet materniteti në Preshevë?! A thua këtë çështje po e ndalon qeveria e Serbisë, apo po tentohet të bëhet në prag të zgjedhjeve që jo larg do t`i kemi?!- madje burime konfidenciale e pohojnë se qeveria dhe ministria përkatëse kanë lëshuar tashmë leje për hapjen e Maternitetit!

Vallë a nuk janë të pakta këto argumente që dëshmojnë një analfabetizëm politik, një qasje tërësisht anakronike me veprimet dhe obligimet e njeriut që përfaqëson komunën?!

Tendenca për të hedhur hi syve të opinionit shqiptarë edhe në momentet më tragjike, në momentet kur edhe ky emision ishte i dedikuar avancimit të të drejtave të shqiptarëve, nuk do koment se vë një dilemë të madhe para secilit që e ndien veten shqiptar- vallë nëse ky mbron interesin shqiptar apo,…

Edhe sa kohë duhet që të heshtim, të durojmë represionin serb, madje edhe këtë represion “pseudo-patriotik”, kjo zatën më motivoi që unë të mos hesht, karshi këtij analfabetizmi politik, por të reagoj të paktën si një shqiptar i vogël karshi “liderëve të mëdhenj”, dhe të dëshmojmë se këtu një shumicë e madhe mendon ndryshe, mendon që të zë hapin e humbur, me punë, qoftë kjo e lejimit të Abetares, apo e këmbimit të studentëve përmes Ambasadës së Shqipërisë, projekteve ekonomike dhe hapat e mëtejmë të integrimeve, por duke plotësuar obligimet elementare të kësaj popullate e jo përmes telave të patriotizmit folklorik…