Feja, udhëkryqi ynë

Ne e dimë se jemi shtet laik, sipas Kushtetutës se Republikës së Kosovës, por kjo nuk do të thotë se ne jemi kundër besimeve fetare. Ne duhet të vazhdojmë rrugës se drejt që të mos mbesim ne udhëkryq duke e shikuar të kaluarën, se çdo njeri e ka besimin e vet, të cilin ai e realizon së bashku më unin e tij, por e rëndësishme për njeriun është zhvillimi i mëtutjeshëm që garanton një të ardhme të ndritur për të.

Feja duhet të prodhoje harmoni mes njerëzve, ky është edhe roli i saj, dhe asnjëherë shfaqja e ideve fetare të mos reflektohen negativisht te tjerët, secili duhet ta ruajë kultin e vet, dhe të mos e dëmtojë mendimin e tjetrit, por ne duhet te lidhemi me fakte konkrete dhe të besojmë ne një Perëndi të vetëm, si krijuesi dhe sunduesi i botes dhe i universit.

Njeriut i nevojitet dituri, arsimim, kulturë reciproke, tolerancë dhe bashkëpunim mes veti, urtësi dhe dashuri mes njëri-tjetrit, kjo është ajo që i duhet gjithë njerëzimit.

Nuk dua të paragjykoj, por ne të gjithë duhet të kemi mirëkuptim mes veti, së pari të respektojmë fenë tonë, e mandej edhe besimet tjera fetare, dhe të jemi të shkëputur nga paragjykimet e ndryshme, të cilat po na imponohen me apo pa dashjen tonë.

Duhet të kemi një perspektivë pozitive, dhe të jemi komplet të pavarur nga feja, të besojmë në një Zot dhe të prodhojmë harmoni mes njeri-tjetrit, kjo është gjeja më e rëndësishme për të gjithë njerëzit, sepse një fjale e urte thotë “Prift e hoxhë mund të bëhet kushdo, por njeri është vështire të bëhesh”.

Ne nuk duhet t’i shohim gjerat ashtu siç duken, apo siç janë duke na imponuar, por duhet të kemi një shtrirje të gjerë fetare, ku secili duhet të ketë të drejte të shprehë besimin e vet. Vetëm kështu i tregojmë botës se jemi shtet demokratik, ku toleranca fetare nuk është e imponuar, por e drejtë e secilit për ta zgjedhur, vetëm atëherë dominon energji e përbashkët ne secilin vend ku ne jetojmë dhe veprojmë të gjithë së bashku.

Pra, ne kemi nevoje për një drejtim të ri të të menduarit, dhe të kemi toleranca fetare në të gjithë vendin, dhe të mos kthehemi mbrapa e të merremi me kisha e xhamia, se vërtet ka qenë mendim i drejte i Pashko Vasës se feja e shqiptarit është Shqiptaria.

Duhet të ndërtojmë një komb shqiptar më respekt dhe krenari, ky duhet të jete synimi i të gjithëve, dhe t’u shmangemi keqkuptimeve të ndryshme fetare, siç ndodhi më rastin e fundit, nuk dua të flas më, por dua të them se ç’fare kuptimi ka feja, ku njeriu që pretendon që është fetar të shprehë mllefe kundër besimeve tjera.

Siç thuhet se besimet fetare pretendojnë të jene praktikë jetësore e njeriut dhe metodologji e të menduarit të tij, por shume njerëz të besimeve të ndryshme nuk po veprojnë ashtu, unë them se ne duhet të eksplorojmë realitetin ku jetojmë dhe veprojmë përmes gjuhës së komunikimit, që është mjeti më i drejtë dhe më demokratik. Tendencat e tilla të cilat ndodhën të mos përsëriten, se janë të rrezikshme për gjithë shoqërinë kosovare.

Ne nuk duhet të krahasohemi më vendet e ndryshme të botes, por të nisemi nga rilindësit tanë që thoshin se te kombi shqiptar, çështja e shtetit dhe fesë janë të ndara tradicionalisht. Që në atë kohe, anëtaret e Rilindjes kishin përfytyrime të qarta sa i përket kësaj çështje, dhe kjo duket se edhe ishte e bazuar në natyrën e popullit.

Ne duhet të pasqyrojmë realitetin e ri të cilin po e ndërtojmë të gjithë se basku, të japim mesazhin për suksesin e arritur në të gjitha fushat e jetës shoqërore.