Kryeministër, tash për tash “flej dath”!

Mos e kap tigrin për bishti, por nëse e ke kap tash mos e lësho! (Proverb angolas)

Një kundërshtar politik i Kryeministrit Thaçi, para disa ditësh, pak para se të futeshim ne një debat televiziv, më tha diçka që rrallë kush mund të besoj, se nga goja e këtij personi mund të dali një pohim i tillë. “Nuk ka kush, për momentin që e zëvendëson Thaçin në Kosovë. Kam pasur biseda, por edhe kërkesa për propozim të ndonjë personi nga ana ime, edhe nga disa ndërkombëtarë me ndikim në Kosovë, që të japi ndonjë emër konkret, por më besoni se as unë, nuk kam as ide, por as solucion adekuat, për të propozuar dikend, që në këto rrethana dhe kushte në të cilat po kalon Kosova, do të mund të kryente punë”, tha pos tjerash ky lider politik.

Dha, edhe emra të personaliteteve ndërkombëtare, me të cilët, (sipas tij) ka kontakte të shpeshta, dhe shtoi, se tash për tash, në këto rrethana, në të cilat po kalon Kosova, (e që janë kontribut i Thaçit), por edhe po ballafaqohet edhe rajoni, Hashim Thaçi është lidershipi, i cili po e “luan lojën” më së miri. “E kam kundërshtarë të ashpër politik, dhe me shumë veprime të tija nuk pajtohem, por nuk ka dilemë se vetëm falë këtyre “shkathtësive”, ai ka arritur të faktorizohet, dhe të na mund të gjithë neve”, tha ky oponent i liderit të PDK-së dhe Kryeministrit aktual duke shtuar se “mbrapa vehtes, Thaçi ka edhe një pjesë të faktorëve ndërkombëtar me ndikim”.

Pse e tha këtë konstatim, të cilin nuk e elaboroi më gjatë, e që me siguri është mendim i tij personal, por duke u bazuar në rolin dhe ndikimin e gjithë liderëve në subjektet politike kosovare, atëherë mund të themi, se ky mesazh ka edhe qëllimin, por edhe prapavijën e caktuar. S’ka dilemë se Kryeministri Thaçi, deri tash, pa vështirësi (te gjitha protestat i ka përmbyll pa turbulenca të mëdha) po i tejkalon gjitha pengesat me të cilat po ballafaqohet, e që vështirë mund të gjendet dikush tjetër në Kosovë, në këto rrethana aktuale, me të cilat po ballafaqohet vendi, që do t’i tejkalonte!

Duke u nisur nga gjendja e rëndë ekonomike me të cilën po ballafaqohet popullata,
pastaj situata e krijuar veçanërisht kohëve të fundit, në arsim, shëndetësi, e në sektorë tjerë, kur nuk iu përmbushën premtimet për rritje të paralajmëruar pagash, por edhe fërkimet, arrestimet, eliminimet politike,… janë vetëm disa “mini fakte” që tregojnë se, kryeministri Thaçi “ndoshta” “me qëllim” po e mban situatën e tensionuar për të mbijetuar, e për të mbetur sa më gjatë në politikë e për të pas pushtet absolut.

Ndoshta, është edhe ndonjë skenar që për momentin sipas tij dhe “këshilltarëve të tij” është “ilaçi” më i mirë për të eliminuar edhe kundërshtarët politik, por edhe për tu faktorizuar, se ai është NJËSHI në Kosovë, që si lider i një subjekti më të madh në vend, të bindë edhe gjithë faktorët relevant vendor, por edhe ata ndërkombëtarë, për fuqinë me të cilën disponon, (që të kenë kujdes) e që mund të ndërlidhet edhe me konstatimin e kundërshtarit të tij politik i cili (deklarativisht) e pranoi siç e ceka më lartë!

Nëse kësaj, ia shtojmë edhe faktin se para disa ditësh, Kryeministri Thaçi, për 100 ditë të Qeverisjes 2, ka arritur të kompletoj një kabinet qeveritarë, me zëvendëskryeministra, ministra, e zëvendësministra, me një numër mbi 6o sish, e që (me përjashtime të rralla) sikur shefi tu thoshte, jo vetëm që (mos) veproni kështu apo ashtu, por edhe të kërkonte që ata të futeshin në grevë, është një bindje dhe një opinion, se ata pa hezitim do të përfillnin një gjë të tillë, dhe do të bënin gara se cili do të fillonte i pari, dhe do t’i hynte në hatër më shumë Shefit.

Pra, realisht mund te themi se kryeministri Thaçi, me veprimet e tija dhe politikën që instaloi, që nga koha kur mori timonin e Qeverisë, pos që dalë nga dalë arriti ta “pastrojë” partinë e tij nga “të padëgjueshmit”, ndërkohë ofroi afër veti personalitete dhe figura që “kujdestarojnë” ditë e natë vetëm për të qenë afër tij, dhe për të përfituar edhe ata dika në këtë “hallakamë”; pastaj Parlamentin e “armatosi” me anëtarë të SHIK-ut e me disa “anonimus” persona, si dhe e veçanta dhe “specialitet” i posaçëm i tij, është se ka arritur që të krijoj shtrirje edhe në subjektet tjera politike me njerëz që janë në shërbim të tij.

Kur e them këtë të fundit, po e ilustroj me një fakt: Vetëm disa ditë para se të fillonte fushata parazgjedhore e dhjetorit të vitit të kaluar, për zgjedhjet e përgjithshme, në një takim rasti me kryeministrin, kur e pyeta se si i ka punët dhe disponimin para zgjedhjeve të përgjithshme, pos shume qëndrimeve tjera optimiste, më pat dhënë emra personash të cilët, sipas tij, janë “njerëz te tij” në subjektet tjera politike, të cilët pa problem punojnë për PDK-ne dhe personalisht llogaritë në ndihmën e madhe të tyre.

Me besoni, kur sot, shohë këta njerëz se si veprojnë, ku janë pozicionuar dhe cilat janë raportet e tyre, pikërisht më kryeministrin Thaçi, me bindje të plot e them: “Tash për tash, Kryeministër, flej dath”. Por, një gjë duhet ditur kryeministër, kujdes nga të huajt të cilët jo rrallë miqtë më të mëdhenj i “konvertojnë” në “armiq” apo thënë më butë në kundërshtarë, por gjithashtu duhet pranuar se nuk ka të përjetshëm asgjë, jo vetëm në poste, por as në këtë botë!