Bota po shndërrohet në ‘fshat prej qelqi’

Filozofi dhe profesori i letërsisë angleze kanadezi, Marshall McLuhan, në vitin 1962 pati dhënë një term shumë interesant, që është i tillë edhe për ditët tona, termin “Fshati global”. Ai me këtë term nënkuptonte se bota po shkon drejt një teknologjie elektronike dhe se sot (është fjala për vitet 60), çdo njeri mund të informohet shumë shpejt për atë që ndodhë në botë. Kurse ushtari Bradley Manning, me nxjerrjen e dokumenteve sekrete në një farë mënyre na ka treguar se bota po shkon drejt një “fshati prej qelqi”, në të cilin çdo gjë mund të shihet online.

Ky ushtar i ri amerikan duke “donwlodu” këngë të Laid Gagas, “donwlodon” dokumente sekrete që kanë lidhje me diplomacinë botërore në veçanti për atë amerikane. Këto dokumente rreth 250000, janë publikuar në uebfaqen Wikileaks, por të “filtruara” nga redaktorët e shumtë, dhe të botuara në gazetat dhe revistat më të njohura botërore si në The New Jork Times, Guardian, Der Shpigel, El Pais dhe Le Mond.

Wikileaks me marrjen e këtyre dokumenteve na tregoi se Amerika edhe pse është superfuqi botërore, ajo ka sektor ku çalon, duke i shkaktuar kokëçarje të mëdha administratës së Obamës. Kjo më së miri u vërejt në fytyrën e sekretares amerikane Hillary Clinton, e cila u shpreh mjaftë e shqetësuar me publikimin e këtyre dokumenteve. Se a do të ketë çarje në marrëdhëniet diplomatike të SHBA-së me shtetet tjera mbetet të shihet.

Wikileaks më shumë konfirmon, sesa informon

Në dokumentet e zbuluara deri më sot në media, sidomos dokumentet me përmbajtje politike, Wikileaks më shumë konfirmon sesa informon për atë që ka ndodh në botë. Është fjala për shumicën e dokumenteve të publikuar deri më tani. Ata të cilët përcjellin lajme për kryeministrin italian, Silvio Berlusconi, nuk informohen nga publikimet e Wikileak për aferat e tij seksuale, sepse e dimë që Berlusconi është kryeministri më “donzhuan” i botës. Se Rusia është shtet mafioz, dhe se Putini është kryemafiozi i Rusisë, këtë e kemi ditur, kurse Wikileaks na e konfirmon. Është shkruar në disa media evropiane, e sidomos në ato sllovene, se takimi i Obamës me presidentin slloven ka qenë i kushtëzuar për Slloveninë, kjo konfirmohet edhe nga Wikileaks. Për atw qw ndodh nw Afganistan dhe Irak është lexuar në mes rreshtave edhe pwrpara, ndërsa Wikileaks publikon fakte mbi këto ngjarje.

Në mesin e shumë dokumenteve të zbuluara nga Wikileaks gjendet edhe Kosova. E si mund të shpëtonte edhe Kosova e cila më shumë se një dekadë është në agjendën e ngjeshur të diplomacisë amerikane. Ajo që më ka habitur janë dokumentet e Ambasadës Amerikane në Prishtinë, në lidhje me paaftësinë e EULEX për të vepruar në veri dhe sidomos ajo që më ka lënë gojëhapur është dokumenti ku tregon që Ambasada Amerikan kërkon arrestimin e të korruptuarve nga EULEX-si. Pse kam qenë i habitur? Sepse kam menduar se Ambasada Amerikane po i mban në liri “brejtësit” e thesarit të Kosovës. Nuk mund ta paramendoja se Amerika po e pengon arrestimin e të dyshuarve për korrupsion, është fjala për të ashtuquajturit “peshqit e mëdhenj”. Por Wikileaks mi largoi dyshimet.

Ajo që më mbetet merak është që të zbulohen dokumente në lidhje me bisedimet në Rambuje, pastaj për pavarësinë e Kosovës, e sidomos dokumente në lidhje me liderët tanë. Kosova si shtet i ri, por me histori qysh kur është krijuar njeriu, ka nevojë që t’i zhvesh nga mitizimi politikanët tanë të cilët e konsiderojnë vetën profetë. Me publikimet e dokumenteve nga Wikiliksi, një njeri, një organizatë, një shtet është paralajmëruar se jo gjithmonë të bëmat e tyre do të mbeten të pa zbuluara. Besoj se tani e tutje dokumentet sekrete do të ruhen edhe më mirë, por kureshtja e njerëzve për të “donwlodur” përtej Laid Gagës do të jetë në trend.