Nëse ideja është vërtet kapital

Kushtetutshmëria e Republikës së Maqedonisë po varet nga vullneti i mirë i shumicës politike në vend, ose nga partia shtet VMRO-DPMNE. Ajo u pa edhe gjatë manifestimit të përvjetorit të kësaj partie ose ideje në sheshin e Shkupit nga ana e VMRO-DPMNE dhe në një ambient të mbyllur nga ana e VMRO-popullore.

Dy fotografi në dy vende të ndryshme, por që kanë një mesazh të përbashkët historik për gjurmuesin e ngjarjeve politike. Ngadalë po zbulohet edhe hija e Nikolla Gruevskit që po sillet nëpër rrugët e Shkupit si një Xhon Travolta i vokabularëve fashiste.

Bashkëdyzimi i fshehtë midis VMRO-DPMNE dhe VMRO-popullore ka qenë i paralajmëruar edhe nga analistë të mëhershëm në Republikën e Maqedonisë. Këtu lind ideja, që Marksi do të thonte se është kapital, ndërsa epoka e artë e tij po rikthehet në skenë me sjelljet e pamatura të ‘shtetit’ Gruevski.

BDI zbuti qëndrimet e saj sa i përket koalicionit qeveritar dhe u pajtua me disa doza nga ana e partnerit të saj.

Këto ditë opozita më e madhe në vend LSDM është në një aksion të gjithëmbarshëm kundër qeverisjes së Nikolla Gruevskit dhe përmes prezencës së saj nëpër media po gjejnë të gjitha mangësitë e kësaj qeverie. Sipas LSDM organizimi i përvjetorit të VMRO-DPMNE në sheshin e Shkupit në atë mënyrë jep mesazhe të qarta për shndërrimin e këtij shteti në parti-shtet. Por, edhe partitë tjera opozitare e kundërshtuan veprimin arrogant të VMRO-DPMNE.

Orientimi ortodoks i qeverisë së Republikës së Maqedonisë e ka nxjerr jashtë loje logjikën, drejtësinë dhe mendimin e lirë. Për religjionin krishterë Shandor Petefi thotë:” Atje ku besimi është ‘Zot’, mendja është shërbëtor, detyrë e të cilës është të heshtë”. Dhe kjo gjë u dëshmua gjatë shekujve të kaluar kur Krishterimi e kishte fjalën kryesore në rruzullin tokësor. Ai u vu kundër gjithçka logjike, mendore, shkencore për të promovuar dogmat, dhunën dhe ‘shenjtërinë’ e rrugës së tyre.

Orientimi ortodoks i qeverisë së Nikolla Gruevskit mendjen e shndërroi në shërbëtor të dogmave të tyre ideologjike dhe partiake. I kanë mbyllur sytë para gjithçkaje dhe po vazhdojnë planin e tyre për nënshtrimin e qytetarëve të këtij vendi deri në skajshmëri e veçanërisht për nënshtrimin e qytetarëve shqiptarë, boshnjak, turq, romë etj.

Nëse ideja është vërtet kapital, atëherë duhet të merret parasysh përgjigja e Nikolla Gruevskit se pas 19 qershorit vjen 20 qershori. Ndoshta gazetarët e kanë ditur shumë mirë përgjigjen, por ja kryeministri i këtij vendi ka një vullnet të mirë për të përkujtuar. Edhe në muajin qershor, muaj afat i zgjidhjes së kontestit me emrin me Greqinë, Nikolla Gruevski po gjënë metoda dhe mënyra se si për të përfituar publicitet dhe për të mos zgjidhur problemin.

Këto ditë, Maqedoninë vizitoi edhe sekretari i përgjithshëm i NATO-s Anders Fog Rasmusen duke dhënë një mesazh të qartë për qeverinë e këtij vendi se duhet që ti lëvizin gjërat nga vendi në dobi të tij.

Ai, pra Anders Fog Rasmusen në një konferencë për media tha: ”Është e qartë që vendi juaj vazhdon që të arrijë përparim në realizimin e standardeve të NATO-s. E vlerësojmë përparimin që keni arritur dhe përkushtueshmërinë tuaj për reformat e nevojshme, por mbetet që të bëhen reforma të rëndësishme, kështu që mesazhi im është që të vazhdoni me reformat, vazhdoni që të kontribuoni dhe sa më shpejt që është e mundur gjeni zgjidhje për çështjen me emrin. Këto janë çelësat për derën në NATO”( Gazeta Lajm 18.06.2010), ndërsa kryeministri Nikolla Gruevski theksoi:” Edhe më tej vazhdojmë që të kërkojmë zgjidhjen për problemin. Nga ana jonë bëhet maksimumi, ndërsa këtë e presim edhe nga ana tjetër. Deri atëherë Maqedonia mbetet një faktor stabil i NATO-s. Vazhdojmë me reformat dhe me misionet tona në NATO”. ( Gazeta Lajm 18.06.2010)

Në fakt , ai as që ka bërë ndonjë përpjekje të duhur për afrimin e Maqedonisë në NATO. Thjeshtë thënë, ka bërë gjitha të kundërtat me konventat ndërkombëtare për mbrojtjen e lirive dhe të drejtave të njeriut.

Ndërsa koalicioni i saj qeveritar BDI po përgatitet për zgjedhje të parakohshme. Si duket mendësia politike e këtij vendi do të vazhdoj përsëri me avazin e vjetër, kur spontanisht pas 19 qershorit, korrikut, gushtit, etj do të vijë 20. Ky është fati i qytetarëve të Republikës së Maqedonisë. I panjohur për çdo ditë e më shumë.