Gjysmëfinale të nxehta në Kupën e Kosovës

Këtë të enjte do të luhet gjysmëfinalja e parë e Kupës së Kosovës në basketboll mes Sigal Prishtinës dhe Trepçës. Ky derbi jashtëzakonisht i nxehtë do të zhvillohet në palestrën “Sezai Surroi” në Prizren, me fillim nga ora 20:15. Teksa të premten do të zhvillohet gjysmëfinalja tjetër mes Sigkos Bashkimit dhe Pejës.

Peja, Sigal Prishtina, Sigkos Bashkimi dhe Trepça do të jenë këtë javë në akcion për të fituar Kupën e Kosovës në basketboll.

Sigal Prishtina është një favorit i lehtë në këtë përballje por do t’i mungojë plejmejkeri Alvin Snow i cili u lëndua javë më parë. Në anën tjetër, Trepça, e cila befasisht humbi Play-Offin dhe rastin për ta mbrojtur titullin, do të kërkojë me çdo kusht të fitojë së paku Kupën e Kosovës si satisfakcion për stinor.

Ndërsa, të premten do të zhvillohet ndeshja e dytë gjysmëfinale mes Sigkos Bashkimit dhe Pejës. Peja kërkon t’i revanshohet Sigkos Bashkimit për humbjen në gjysmëfinalen e stinorit të kaluar, kur prizrenasit kishin befasuar pejanët në Karagaç.

Teksa, Sigkos Bashkimi, si organizatore e Kupës së Kosovës do të ketë përkrahje të madhe nga publiku. Ekipi i portokalltë nga Prizreni është ekipi më i uritur nga katërshja për ndonjë trofe dhe Kupa shihet si ideale, për të fituar diçka.

Gjysmëfinalet e Kupës së Kosovës:

E enjte, me 25 prill, në Sezai Surroi:
Sigal Prishtina – Trepça 20:15

E premte, me 26 prill, në Sezai Surroi:
Sigkos Bashkimi – Peja 20:15

/Telegrafi/