Krasniqi u takua me presidentin e Peace and Sport

Ministri i Kulturës, Rinisë dhe Sportit, Memli Krasniqi ka takuar sot në Dubai, ku po mbahet Konferenca e radhës e Peace and Sport, themeluesin dhe presidentin e Organizatës Peace and Sport dhe njëherësh president i Asociacionit Botëror të Olimpistëve, Joel Bouzou. Ministri në këtë takim është shoqëruar edhe nga Kryetari i Komitetit Olimpik të Kosovës, Besim Hasani, thuhet në një komunikatë të MKRS-së.

Ministri Krasniqi e ka njoftuar zotin Bouzou për të arriturat dhe sfidat e sportit në Kosovë, në veçanti në ndërkombëtarizim. Ai ka folur për disa nga hapat që gjithë komuniteti sportiv dhe institucionet shtetërore kanë ndërmarrë në dy drejtimet, në ndërkombëtarizim por edhe në zhvillim të brendshëm. Ministri ka theksuar edhe një herë faktin se me sportistët e Kosovës po bëhet një padrejtësi tash e sa vjet, duke mos qenë pjesë e barabartë e garave ndërkombëtare. Me këtë rast ai ka kërkuar nga zoti Bouzou që të japë përkrahje në ndërkombëtarizim, ne veçanti në procesin e anëtarësimit të Komitetit Olimpik të Kosovës në Komitetin Olimpik Ndërkombëtar. Ai shtoi se Kosova krahas kësaj po punon që të përmirësojë dukshëm infrastrukturën në sport, si dhe gjithë legjislacionin për ta harmonizuar atë me praktikat më të mira ndërkombëtare. Kosova, tha ministri, ka shumë talentë të rinj, dhe të cilët po punojnë më shumë pasion, edhe përkundër kushteve jo të favorshme, me një izolim ndërkombëtar. Pikërisht për këtë, tha ministri, Qeveria e Kosovës në prioritetet e saja për sportin ka sportin universitar dhe shkollor, që ndihmojnë në masivizim dhe nxjerrjen e talentëve të rinj. Ai shtoi se Kosova sportin e sheh vërtetë si një mundësi që njerëzit të jenë edhe më të bashkuar.

Nga ana tjetër, presidenti i Peace and Sport, Joel Bouzou ka shprehur kënaqësinë për prezencën e Ministrit Krasniqi dhe Kryetarit të KOK-ut Hasani në këtë konferencë. Ai ka vlerësuar lartë angazhimet që janë bërë në Kosovë për avancim të sportistëve. Bouzou ka mbështetur kërkesën e Kosovës që sa më shpejtë të jetë pjesë e të gjithave garave ndërkombëtarë në sport. Presidenti i Peace and Sport ka shprehur bashkëpunimin e tij për komunitetin sportiv në Kosovë, dhe duke vlerësuar se me këtë do të avancohet edhe më shumë paqja përmes sportit, transmeton Koha.

Peace and Sport është themeluar në vitin 2007 nga Joel Bouzou dhe ka një shtrirje të gjerë në mbarë botën. Kjo organizatë çdo vit mbledh qindra përfaqësues shtetesh në konferencën vjetore dhe synimi kryesor është avancimi i paqes përmes sportit, duke u fokusuar tek gjeneratat e reja. Nisma për themelimin e Peace and Sport është nën patronatin e Princit të Monaco-s, Alberti i II-të. Konferenca e sivjetshme që po mbahet ne Dubai po mbahet në Patronatin Princit të Dubait, Sheikut Hamdan Bin Mohammed Bin Rashid Al Maktoum. Në forumin e sivjetshëm po marrin pjesë shumë ministra të sportit nga vende të ndryshme të botës, kryetar të federatave dhe asociacioneve sportive, si dhe biznesmenë të shumtë që sponsorizojnë rregullisht sportin. /Telegrafi/