Ronaldo nënshkroi, por duhet të pasojnë trofetë

Rinovimi i Cristiano Ronaldos me Real Madridin është një lajm fantastik për klubin mbretëror që pati një afati kalimtar veror mjaft dinamik duke larguar disa lojtarë, por duke sjellë trajner të ri dhe futbollistë, si Isco dhe si supertransferi Gareth Bale.

Superylli portugez tash do ta bartë fanellën e Los Blancos deri në vitin 2018 dhe kontrata e re ia ka plotësuar të gjitha kërkesat financiare duke e bërë atë, sipas AS, futbollistin më të paguar në histori me 21 milionë euro përfitime neto për sezon vetëm nga paga.

Vazhdimi i kontratës do të thotë se 28-vjeçari është më se i motivuar, prandaj duhet të pasojnë titujt. Florentino Perez ka shpenzuar qindra miliona euro për të ndërtuar një skuadër, e cila në radhë të parë do t’i konkurrojë Barcelonës në La Liga e Kupën e Mbretit dhe pastaj të sjellë trofeun e shumëpritur të tifozëve madrilenë ‘la Decima’ – titullin e dhjetë të Ligës së Kampionëve.

Për CR7 flasin shifrat, 203 gola në 203 paraqitje me Realin, dhe ai ishte njeriu që e nxori skuadrën nga momentet e vështira në katër vitet e kaluara dhe tash planifikon të bëhet golashënuesi më i mirë në histori të klubit (rekord që mbahet nga Raul, me 323 gola).

“Shpresoj që të shënoj edhe 200 gola të tjerë në katër vitet e ardhshme. Rekordet janë për t’u thyer, por nuk janë gjëja më e rëndësishme – më e rëndësishme është të fitohen trofe”, ka deklaruar Ronaldo.

Që kur kaloi në Santiago Bernabeu (në vitin 2009 nga Manchester Unitedi), sa u përket trofeve, ai ka fituar vetëm tri sosh: një titull të La Ligas, një Kupë të Mbretit dhe një Superkupë të Spanjës.

Padyshim që nuk është faji i Ronaldos që Reali nuk i ka fituar titujt e duhur në vitet e fundit, përkundër përforcimeve të vazhdueshme. Por, tash është momenti i fundit që portugezi të marrë atë që meriton duke qenë se karriera e tij kulmore po përjeton vitet e fundit.

“Jam i sigurt se do ta fitojmë ‘La Decima’ me Cristianon”, ka deklaruar më herët Perez, ndërsa për ta bërë këtë me 28-vjeçarin në formacion, kanë mbetur edhe pesë vite (deri kur përfundon kontrata e tij, në vitin 2018). /Telegrafi/