Kosova, sukses në turneun ndërkombëtar të shahut

Në turneun ndërkombëtar të shahut të mbajtur në Maqedoni, “Karpos Open 2013”, ka marrë pjesë edhe Kosova, ku garuesi i vetëm është kthyer me rejting të lart ndërkombëtar.

Kampioni i gjashtëfishtë i Kosovës për të rinj në shah, Sulejman Kollari, ka përfaqësuar Kosovën nën flamurin e Shqipërisë në turneun “Karpos Open”.

Kollari thotë se ky turne ishte shumë i suksesshëm për të, pasi ka marrë rejting ndërkombëtar 2108, që është një sukses i jashtëzakonshëm.

“Kam zhvilluar gjithsej nëntë duele, katër prej të cilave i kam fituar, dy kanë përfunduar me barazim dhe tri i kam humbur”.

“Ndihem mjaft i kënaqur pasi kam fituar rejting shumë të mirë ndërkombëtar. Të gjitha duelet ishin interesante, por më duhet që të përmendi duelin me mjeshtrin e madh maqedonas, Orce Dancevskin, të cilin isha pranë ta mposht dhe nga dëshira e madhe për ta mposhtur, i hyra rrezikut dhe në fund me përvojën e tij ai më mposhti”.

“Në përgjithësi jam mjaft i kënaqur dhe ndihem krenar që kam garuar nën flamurin e kombëtares tonë”, është shprehur Kollari për Telegrafin.

Në turneun “Karpos Open” morrën pjesë 60 kryemjeshtër të shahut dhe 30 intermjeshtër të klasit botëror.

Sulejman Kollari është gjashtë herë kampion i Kosovës për të rinj dhe ka përfaqësuar Kosovën në dy kampionate botërore, dy kampionate evropiane dhe një kampionat ballkanik. /Telegrafi/