Peja e mposht Trepçën me vështirësi

Në një përballje tejet të nxehtë, në kuadër të xhiros së 17-të të BKT Superligës në basketboll, Peja arriti ta mposhtë Trepçën me vështirësi në minutat e fundit të takimit me rezultat 72-75.

Ndeshja u zhvillua në Vushtrri, në palestrën “TOTA”, ku ishin prezentë shumë tifozë të Torcidave të cilët dhuruan një atmosfere të veçantë gjatë tërë ndeshjes.

Çereku i parë filloi me ritëm të shpejtë ku skuadrat nuk i dhanë fare rëndësi repartit defensiv. Fakt interesant i këtij çereku ishte se u shënuan hiq më pak se nëntë trepikësha. Pejanët u treguan më efikas dhe e përmbyllën këtë çerek në epërsi të tyre, 21:24.

Çerekun e dytë, Trepça e nisi shumë mirë duke krijuar një epërsi prej pesë pikëve, por me kalimin e kohës e humbën disi fillin e lojës dhe i lejuan pejanët të dalin në epërsi, 39:41. Vlen të përmendet kontributi i jashtëzakonshëm i Dardan Berishës që shkëlqeu në këtë pjesë.

Edhe çerekun e tretë mitrovicasit e nisën shumë më mirë dhe me plot meritë arritën të dalin në epërsi, 61:60.

Ndërsa, në çerekun e katërt u zhvillua një luftë e vërtetë për çdo top. Vendasit filluan të bëjnë shumë gabime, teksa mysafirët i shfrytëzuan shumë mirë ato për ta mbyllur këtë takim me një fitore shumë të rëndësishme. Rezultati përfundimtar i takimit ishte 72-75 në të mirë të Pejës.

Lojtari më i miri i ndeshjes padyshim se ishte Samir Shaptahoviq me 26 pikë, gjashtë kërcime, pesë asistime dhe katër topa të vjedhur, teksa edhe Dardan Berisha shtoi 26 pikë të tjera. Për Trepçën më i miri ishte Drilon Hajrizi me 28 pikë.

Rezultatet e xhiros së 17-të:

Vëllaznimi – Drita 79-82
SigKos Bashkimi – Kosova (V) 119-80
Trepça – Peja 72-75

Sigal Prishtina – RTV 21, e enjte 19:30

/Telegrafi/