Digjet një banesë në Elbasan

Një zjarr i rënë në rrethana ende të paqarta, ka djegur plotësisht një banesë njëkatëshe në lagjen “Spahikorre” të qytetit të Elbasanit, fatmirësisht pa pasoja në njerëz.

Policia dhe forcat zjarrfikëse konfirmojnë se zjarri ka djegur vetëm orenditë e shtëpisë dhe nuk ka patur dëme në njerëz, pasi familja kishte më shumë se dhjetë vjet që nuk jetonte në këtë banesë. Ndërsa flakët e zjarrit të favorizuar edhe nga era e nxehtë janë përhapur me shpejtësi, duke rrezikuar edhe disa banesa shumë pranë.

Dy mjete zjarrfikëse kanë shkuar në vendin e ngjarjes duke bërë të mundur lokalizimin dhe shuarjen e zjarrit. Grupi hetimor në vendngjarje paraprakisht konkludon se shkak i zjarrit mund të ketë qenë një cigare e ndezur hedhur padashur në çatinë e banesës së pabanuar, megjithatë, sipas burimeve, nuk përjashtohet edhe ndonjë shkëndijë elektrike. Ndërkohë, hetimet vazhdojnë për të zbardhur rrethanat e rënies së zjarrit.

Ky është rasti i parë i zjarreve në qarkun e Elbasanit në këtë stinë të nxehtë vere, raportoi BW./Telegrafi/