Arrestohet një femër për mashtrim me viza

Një femër 35 vjeçare, është arrestuar në Mitrovicë, mbi baza të dyshimit të përfshirjes së saj në vepra penale të mashtrimit.

Policia ka ndjekur hetimet të ndërtuara mbi bazën e dyshimit për përfshirjen e mundshme të së dyshuarës në vepra penale të mashtrimit me premtim të rregullimit të vizave për ekskursion të nxënësve nga Kosova në Angli ka thënë zëdhënësi i policisë për rajonin e Mitrovicës, Besim Hoti.

Sipas tij e dyshuara është arrestuar në një shkollë private të gjuhës angleze në Mitrovicë, pronare e së cilës është vetë e dyshuara, ndërsa 13 pasaporta të Republikës së Kosovës janë sekuestruar nga Policia e Kosovës në objektin shkollor privat të gjuhës angleze.

Gjatë bastisjes, në çantën personale të së dyshuarës policia ka sekuestruar një armë së bashku me 11 fishekë. Si pjesë e procedurave të parapara në vazhdimësi të hetimeve, policia ka bërë kontrollin e banesës së të dyshuarës në Mitrovicë, ndërsa janë identifikuar edhe 3 pasaporta të tjerë të Republikës së Kosovës.

Dyshohet se ajo, me premtim për rregullim të vizave angleze, për organizim në një ekskursion në Angli, nxënësve u ka kërkuar para në vlerë prej 500-800 euro, ndërsa udhëtimi nuk është realizuar asnjëherë deri më tani, ka thënë policia.

Veç rastit të iniciuar si vepër penale me elemente të mashtrimit, policia e Kosovës ka iniciuar edhe një paraqitje penale për “mbajtje në pronësi, kontroll dhe shfrytëzim të paautorizuar të armëve”.

Prokurori publik i Prokurorisë së Qarkut në Mitrovicë, i cili është informuar lidhur me veprimet e ndërmarra të policisë, ka autorizuar lirimin e të dyshuarës nga ndalimi policor, ndërsa rasti do të dorëzohet në procedurë të rregullt gjyqësore. /Koha//Telegrafi/