Shtrenjtimi i rrymës rrit edhe koston e prodhimit

Shtrenjtimit e fundit të energjisë elektrike në vend, mund të rris koston e prodhimit, sidomos tek ndërmarrjet industriale dhe kompanitë e mëdha prodhuese. Me vendimin për shtrenjtim të rrymës vështirësohet edhe gjendja e biznesit vendor, ndërsa shtohen hezitimet e investitorëve të huaj për të investuar në Kosovë.

Alban Zogaj nga Instituti “RIINVEST”, ka thënë për Telegrafin se energjia elektrike përbën një ndër kostot kryesore të prodhimit, për çka kjo analizohet me vëmendje nga investitorët e huaj.

“Ngritja e çmimit të energjisë elektrike rrit koston e prodhimit, e kjo rezulton edhe në çmime më të larta për produktin e prodhuar. Çmimi më i lartë i produktit final mund t’i bëjë ato produkte jokonkurrente”, tha Zogaj.

Edhe drejtori i Agjencisë për Promovimin e Investimeve në Kosovë, Valdrin Lluka, ka thënë për Telegrafin se shtrenjtimi i energjisë elektrike ndikon direkt në rritjen e kostos së prodhimit.

“Ne jemi ndër vendet e vetme ku bizneset financojnë kryesisht konsumin e përditshëm të energjisë, duke mos u mundësuar bizneseve të kenë çmime industriale të energjisë që – përafërsisht në shtetet e Bashkimit Evropian – shkojnë me rreth 50 për qind më pak se sa për konsumin privat”, thekson Lluka.

Sipas tij, shtrenjtimi i rrymës mund të largojë edhe interesimin e investitorëve të mëdhenj për të investuar, pasi veprimtaria e tyre kërkon shpenzime të mëdha të energjisë elektrike.

“Ato industri që janë të rënda e ku konsumi i energjisë është i madh, mund të mos tregojnë interes për vendin tonë, për shkak të rritjes së kostos së energjisë apo rrezikut të ngritjes së çmimeve edhe në të ardhmen”, ka thënë Lluka.

Ndërkaq, nga ndërmarrja e cila është privatizuar vite më parë, Ferronikeli, thonë se shtrenjtimi i energjisë elektrike në dy muajt e fundit ka rritur koston e prodhimit, si dhe ka shtuar shpenzimet për energji elektrike deri në rreth tre milionë brenda muajit.

“Shtrenjtimet e fundit të energjisë – për neve si kompani – kanë shkaktuar probleme në operim. Bizneset kanë nevojë për stabilitet dhe këto ndryshime negative janë shumë të dëmshme për klimën e të bërit biznes”, thotë Sherife Kqiku – Vishaj, zëdhënëse e Ferronikelit.

Sipas saj, Ferronikeli është shpenzuesi më i madh i energjisë elektrike në Kosovë dhe ky shtrenjtim i ka goditur shumë.

”Kostoja mujore me këtë shtrenjtim është rritur për rreth 300 mijë euro dhe faturat që ne i paguajmë janë rreth 2.5-3 milionë në muaj. Sigurisht që kjo rritje e çmimit të energjisë elektrike do të këtë ndikim të madh në prodhim dhe në operim të kompanisë”, thotë ajo.

Sherife Kqiku – Vishaj thekson se nëse nuk merren masat për stabilizim të çmimeve të energjisë elektrike ose liberalizim të tregut, kjo do të jetë faktor që do të ndikojë në mungesën e investimeve të huaja e madje edhe me largimin e bizneseve që tashmë kanë investuar në Kosovë. /Telegrafi/