Rrëfime futbolli te berberi i lagjes

Unë nga futbolli nuk marr vesh, por futboll kam parë ata që njëherë në njëqind vjet vijnë. Atëherë kur nuk kishte lindur futbolli total që i ka fshirë yjet, secili ishte një yll më vete. Pse kujton ti se nuk kam mbajtur posterat e Juves, Milanit, Interit nëpër muret e dhomës! Me lekë i blinim fshehurazi. Mërzia kur mundej Juventusi që e ndiqja fillimisht me radio dhe pastaj në 20 pa një çerek në darkë në TV, shkonte në dramë.

Kush nuk ka parë Betegën, Kapelon, Halerin në ndeshje kampionati italian, transmetuar nga spikera italianë, më thotë se merr vesh nga futbolli!!! Shkollë për trajner futbolli ishte mo! Unë dhe mustaqet ia mbaj mend Macolës të madh, flokët kaçurrela lart të Xhixhi Rivës që kur vinte topin përpara në atë Kaljarin e tij, futej si dem me gjithë top në rrjetë, të merrte përpara. Kush nuk ka parë Netzerin që nuk ishte zot t’ja merrte leshverdhit bishë topin nga këmba në mes fushë e me dy hapa shkonte portë e më portë.

Me dhjetëra kilometra këmbë natën nëpër Tiranë bënim për të shkuar te ndonjëri që kishte televizor Fenola për të parë ndeshjet e botërorit. Njëqind veta në apartament; po të veje me vonesë do e shihje ndeshjen mbrapsht në pasqyrë ulur në shesh te korridori ku reflektohej ekrani. Çfarë të bëje!!!

Mylerin që rrinte te zona e portierit dhe e ngacmonte si mizë, me këmbët e shkurtra si kërrabë, Bekenbaurein që në qendër të mbrojtjes qëndiste çdo ecje me top; Eusebion pis të zi të Benfikës që ngulçonte i gjatë e kërrusur i fortë si skllav negër i shitur në Romë; Bobi Calton që nuk kishte burrë t’i ikte në një rreth prej dhjetë metrash nga trupi i tij se këmbën e kishte si dorë të gjatë që ta merrte topin.

Çfarë nuk kemi parë. Ecjet e Xhaçkës në vijën fundore dhe krosimin e topit nga prapa portës që koka vetëm të pranonte të përplasej me topin dhe… gol; Bizin që hynte me gjithë top në rrjetë duke dribluar; Safet Berishën që kontrollonte topat me kokë në dy portat; Panon që kur niste sprintin dukej sikur po nisej për fluturim avioni.

Çfarë të rrëfej më parë ndeshjen me Gjermaninë ku Gjinali qëllon nga larg, shtyllë dhe topi hyn pas vijës fatale dhe arbitri nuk e "shikon"!!! Atje po në stadium mes shiut e pamë. Ndeshjet Tirona-Partizani kur ra stadiumi. Kot jam gjallë… Apo kur shkonim shihnim dhe stërvitjet; si stërviteshin si portjerë Janku, Dinella, Muhedini etj., si e kishte gjurin e vrarë Kruja, si bënte shakara Kasmi, si stërvitej Ali Mema i madh etj,

Derisa errësohej mo shihnim stërvitjet, lëre ndeshjen… Pse, dje lindi futbolli që na tregojnë ca se luajtëm mirë a keq… Ohuuu, çfarë na kanë parë sytë ne… Kujtojnë se futbolli lindi kur lindën këta.