Pronari qëllon me armë grabitësit e banesës

Një familje në Thumanë të Krujës është tentuar të grabitet në orët e para të mëngjesit të së mërkurës. Një grup prej tre personash kanë ndaluar në autostradën Fushë Krujë-Milot, dhe i janë drejtuar një banese që ndodhej në afërsi të autostradës, për ta grabitur.

Sipas pronarit të shtëpisë Fejzulla Fresku, hajdutët kanë tentuar të hapin dyert e banesës, por familjarët kanë dëgjuar zhurmë dhe kanë dalë menjëherë. Në dalje janë përballur me hajdutët, dhe kryefamiljari ka qëlluar me armë në drejtim të tyre, duke plagosur njërin prej hajdutëve, i cili dyshohet të jetë nga Shkodra.

Dy personat e tjerë kanë mundur të largohen, ndërsa person i tretë, i cili mbeti i plagosur është dërguar në spitalin Ushtarak në Tiranës në gjendje të rëndë shëndetësore. Sipas policisë mësohet gjithashtu se tre personat që kanë tentuar të grabisin familjen Fresku udhëtonin me një makinë të vjedhur mbrëmjen e djeshme në qytetin e Kavajës. Kjo familje është e treta herë që përballet me kërcënimet e hajdutëve.

Ndërkohë policia, bën të ditur se po punon për kapjen e dy autorëve të tjerë, raportoi Balkan Web./Telegrafi/