Premtimet e harruara të kryeministrit Mustafa

Gjatë fushatës për zgjedhjet e parakohshme parlamentare të vitit të kaluar, të gjitha partitë politike kishin premtuar se me marrjen e pushtetit do të krijojnë qindra-mijëra vende të reja të punës. Edhe kryetari i Lidhjes Demokratike të Kosovës, tashmë kryeministër i Kosovës Isa Mustafa, pati premtuar se do të hap 120 mijë vende të reja të punës, pjesën më të madhe në bujqësi dhe veprimtari prodhuese.

Por, të enjten, tetë muaj pas zgjedhjeve, në një konferencë për media kryeministri i Kosovës Isa Mustafa, ka thënë se askush nuk duhet të shpresojë që për gjashtë muaj apo një vit mund të hapen 100 mijë vende pune.

Ai megjithatë, ka thënë se Qeveria e Kosovës është duke bërë përpjekje të vazhdueshme që të krijojë kushte të favorshme për sektorin privat, i cili mundëson edhe krijimin e vendeve të reja të punës. “Zhvillimi ekonomik është një proces dhe nuk është akt që ndodh dhe përfundon. Asnjë qeveri nuk mundet, që si të merr mandatin, të thotë se i themelova 1000 firma private dhe i punësova 100 mijë veta. Por, qeveria ka për detyrë që të krijojë kushte të krijojë rrethana në mënyrë që bizneset të zhvillohen, të investojnë bizneset e brendshme dhe të jashtme. Ky proces do të zhvillohet”, ka thënë kryeministri Mustafa

Deklarata e fundit e kryeministrit Isa Mustafa, për pamundësi të krijimit të vendeve të premtuara të punës, gjatë kësaj periudhe, është shumë më e sinqertë se ajo e dhënë gjatë fushatës zgjedhore, vlerësojnë ekspertë për çështje ekonomike.

Ibrahim Rexhepi, drejtor i Qendrës për Hulumtime Strategjike dhe Sociale “STRAS”, e konsideron të papranueshëm faktin se si qeveria nuk ka ndonjë vizion të konkretizuar për mundësinë e krijimit të vendeve të reja të punës.

“Fushata më tepër kalon në premtime të mëdha dhe me një qasje jo serioze, joqeveritare ndaj premtimeve, meqë janë programet parazgjedhore me anë të së cilave fitohet vota. Por, ajo se nuk mund të parashihet apo nuk mund të thuhet se sa qytetarë do të punësohen, më tepër më lënë përshtypjen e mungesës se një vizioni apo mundësisë se krijimit të vendeve të punës. Prandaj deklarata e tillë, mendoj se është e papranueshme, pasi qeveria duhet të konkretizojë se çfarë do të bëjë për këtë mandat”, ka thënë Rexhepi

Ai, thotë se është obligim i qeverisë që të forcojë sektorin privat, në mënyrë që të rritet numri i të punësuarve, rrjedhimisht përmirësimi i mirëqenies se qytetarëve.

“Qeveria e ka për detyrë, e ka obligim të bëjë diçka, përndryshe është e pakuptueshme dhe si e tillë nuk i duhet askujt. Qeveria duhet të punojë për mirëqenien e qytetarëve, që të arrihet kjo mirëqenie duhet të interesohet për ambientin mbi të cilin duhet të ndërtohet zhvillimi ekonomik. Do të thotë, forcimi i sektorit privat dhe funksionimi i shtetit, respektimi i ligjit, krijimi i sigurisë madje qoftë edhe sigurisë fizike për investitorë dhe qytetarë. E mos të flasim për sigurinë e kapitalit apo edhe për respektimin e kontratave“, thekson Rexhepi.

Ndryshe, sipas shifrave zyrtare shkalla e papunësisë është mbi 35 për qind, për derisa sipas përfaqësuesve të sindikatave të punëtorëve dhe organizatave joqeveritare shkalla e papunësisë në nivel vendi arrin në rreth 60 për qind. /Rel/Telegrafi/