Plaku i Qeverisë!

Që nga çlirimi nuk mbahet në mend që Kosova të ketë pasur vit më të vështirë se vitin që po e lëmë pas (Viti 2015). Kjo është e vërteta po aq sa është e vërtetë se Kosova asnjëherë nuk ka pasur qeverisje kredibile transparente dhe pa korrupsion e ku më së shumti kanë përfituar kryeministrat, zëvendëskryeministrat, ministrat, zëvendësministrat dhe grupe të caktuara të interesit të lidhura me pushtetet, e jo qytetarët dhe Kosova në përgjithësi.

Nëse kthehemi në retrospektiv në kohën kur PDK fitoi për herë të parë zgjedhjet dhe bëri koalicion me LDK-në, në atë që u pat konsideruar si koalicioni i Pavarësisë së Kosovës, LDK pavarësisht se thirret në vlerat institucionale u tregua krejtësisht e papjekur meqë me një veprim fëmijëror brenda pak orëve tërheq ministrat e saj nga Qeveria e atëhershme sepse Gjykata Kushtetuese kryetarin e atëhershëm të LDK-së, Fatmir Sejdiu, e deklaroi si shkelës të Kushtetutës pasi mbante dy pozicione: kryetar i partisë dhe president i vendit.

Pas kaq kohe Kosova përballet me të njëjtin koalicion, pra PDK-LDK. Nëse atëherë i bëri bashkë, pavarësia e Kosovës, tash i bashkoi “Zajednica”.

Para se të vinte “Zajednica” ky pushtet pati probleme qysh në fillimet e saj. Plaku i Qeverisë u bëri mjaftë “dhurata” qytetarëve të Kosovës duke u nisur nga protestat masive në tërë Kosovën për ta shkarkuar njërin nga Rojat e Urës, i cili u bë ministër në Qeverinë e Plakut (Jabllanoviqi që ofendoi rëndë nënat gjakovare). “Dhurata” tjetër që Plaku i Qeverisë ua bëri qytetarëve ishte shpërngulja e qindra e mijëra prej tyre jashtë Kosovës. Dhe, prapë e vazhdoi pushtetin, sepse kishte edhe disa “dhurata” tjera për qytetaret e Kosovës: vazhdimi i bisedimeve pa kushte me Serbinë dhe Malin e Zi, përmes së cilave Plaku i Qeverisë i dhurojë mijëra hektar Malit të Zi, ndërsa Serbinë me çdo kusht po dëshiron ta kthejë në Kosovë përmes “Zajednicës”. Pushteti vazhdonte, e edhe “dhuratat” – si dështimi i pranimit të Kosovës në UNESCO dhe mos liberalizimi i vizave.

Plaku Qeverisë shpërndante “dhurata”, në fund sikur edhe atij iu bë një “dhuratë” nga Gjykata Kushtetuese që në aktgjykimin e saj cilësoi se krijimi i “Zajednicës” është antikushtetues përderisa. Por, ai insiston të vazhdojë me planin dhe me negociatat me Serbinë, e nuk e ndjen nevojë që të sepse e ka edhe një dhuratë në fillim të vitit që Hashim Thaçin ta bëjë president të Kosovës.

Qytetaret e këtij vendi nuk kanë pse ta pranojnë asnjë dhuratë nga ky Plak i Qeverisë, por në fillim të vitit që vjen duhet ti bëjmë dhurata vetes, sepse veç ne e dimë për çka kemi nevojë e të tjerët asnjëherë nuk ia qëlluan deri tash.

Prandaj, qofshim me shëndet, gëzuar Vitin e RI me një tjetër Qeveri!