Përse na duhet, liria e Albinit

Albin Kurti i vlen Kosovës i lirë, ndërsa kauzës së tij i duhet në burg. Ai është bërë sot ajo çfarë ka dashur të bëhet vetë, një idhull i refuzimit të realitetit të ri të Kosovës.

Mijëra shqiptarë në Kosovë e adhurojnë atë si politikan i pakorruptuar, i pakapur nga oligarkët dhe nacionalkomunistët modernë. Këta që e adhurojnë si të tillë dhe që janë shumë, shpresojnë se Kosova bëhet një vend më i mirë me politikanë të tillë. Dhe, unë besoj kështu. Një pjesë tjetër beson se duke mos qenë politikan i kapur, ai është më dinjitoz dhe i vështirë në negociatat kombëtare të ndarjes nga Serbia. Nëse besojmë dhe disa teori konspiracioni, që marrëveshjet janë nënshkruar nën presionin e Gjykatës Speciale dhe kjo veti e tij vlen.

Por, të mos shkojmë më tej, duke krijuar një idoltari për gjëra që as Albini nuk i kërkon.

Shikoj shumë patetizëm për mënyrën si është ndaluar nga policia Albini. Siç e thashë, unë mendoj që ai duhet të jetë i lirë dhe jo në burg, por nëse do të duhej të arrestohej, nuk besoj se kishte mënyrë tjetër për dikë që i ka ikur policisë jo se e ka frikë, por se do të jetë në qendër të vëmendjes si hero. Nuk besoj se po t’i dërgonin tre gra police me edukatë dhe me një tufë lule në dorë, për t’i kërkuar ndjesë për prangat, do mund ta bënin atë. Policia e Shtetit të Kosovës është polici si kudo në botë dhe kur merr urdhër të arrestojë dikë që është në kërkim, s’di si mund të veprojë ndryshe. Uniformat, helmetat dhe prangat e Çolicisë, i prodhon e njëjta fabrikë në botë. Bile dhe ngjyra është njësoj. Kjo nuk i jep ndonjë dramacitet arrestimit të tij.

Zemërimi buron nga fakti se Qeveria e Kosovës konsiderohet e korruptuar, klienteliste dhe që ka lënë dhjetëra kriminelë rrugëve. Mes tyre, fëmijë deputetësh, politikanë hajdutë dhe të përfshirë në krime. Dhe, për këtë shkak, ata irritohen kur shikojnë prangat mbi Altinin. Por, ky nuk është rasti të urrehet policia, por politika. Policia ka bërë detyrën. Në këtë pikë edhe Albini nuk është i drejtë. As ai nuk hyn tek ata politikanë që nuk janë selektivë me drejtësinë. Edhe ai hyn tek ata politikanë për të cilët ka vrasje të mira dhe të dobishme pa gjyq, por me vetgjyqësi, që nuk hetohen kurrë. Nuk e kam dëgjuar kurrë të jetë i qartë dhe i drejtë në dënimin e vrasjeve të pasluftës. Së paku të disa figurave që kishin punë më shumë me letrat se me armët si Xhemajl Mustafa apo Enver Maloku. Kjo, sepse në botëkuptimin e tij nacionalkomunist ekziston një hapësirë për vrasje të drejta, dhe eliminim kundërshtarësh.

Nëse do kishim Albinin kryeministër dhe do të duhej të arrestonte dike, mos mendoni se do qe më elegant. Bile duke qenë më “krenar” për veprën e tij, ai do të jetë dhe më i egër. Do ta bënte atë në emër të kauzës kombëtare dhe të Gjykimit të Madh, si një vepër antipatriotike.

Nuk duhet ngatërruar profili nacionalist dhe populist i Albanit, me dimensionin demokratik të një kryeministri. Unë nuk besoj që Albini është një demokrat. As ai vetë se ka këtë pretendim. Dhe nuk duhet ta vajtojmë për këtë, se e fyejmë.

Ai pretendon të jetë i drejtë, por jo demokrat. Ai është një adhurues i autoritarizmit. Rrethi i tij është linçues ndaj mendimit ndryshe dhe përjashtues ndaj kujtdo që del nga vija. Është adhurues i liderëve autoritarë dhe si i tillë ka një mbështetje të tek eneverizmi shqiptar, i cili ishte një nacionalkomunizëm klasik dhe izolacionist.

Ndaj, kur gjykoni policinë që arreston Albinin, mos u shqetësoni më shumë se Albini. Ai nuk shqetësohet prej tyre, por thjesht që nuk i ka ai në dorë ata. Ai në fakt po e përdor policinë sot në opozitë më shumë se sa do të mund ta përdor nëse bëhet ndonjëherë kryeministër.

Ta duam Albinin për atë që na mungon, për politikanin e pakorruptuar, dhe të pakapur nga oligarkët, por mos kini iluzione demokratike duke vajtuar sot për atë që ai nuk do të donte. Është shumë më problematik një shtet autoritar i Albinit , shumë më e vështirë një shkelje syri e tendencave islamike dhe akoma më keq, një tendencë enverizmi në raport me mendimin ndryshe.

Për këtë arsye ai duhet i lirë dhe i pamitizuar si Profeti që po përndiqet në emër të një lirie që se premton askund.

Beteja e tij kundër estabilishmentit është e pabesueshme kur bashkohet me një ish-kryeministër dhe ish-zëvendëskryeministër dhe beteja për më shumë dinjitet kombëtar bëhet e diskutueshme kur drejtohet kundër aleatëve tanë SHBA e BE, që në fakt janë ata që bënë këtë Kosovë që është. Çdo betejë kundër tyre nuk është betejë për Kosovën, por të shkuarën e saj, që nuk kishte të ardhme.

Ndaj Albini duhet i lirë, i paprangosur dhe i pakënaqur natyrisht. Secili meriton të jetë një opozitar i zakonshëm dhe jo siç tentohet, për të krijuar një mit, duke krijuar portretin e një misionari i cili të çon gjithnjë në një zhgënjim të ri. Është ndaluar një lider opozite duke vënë në provë funksionimin e demokracisë dhe shtetit ligjor në Kosovë. Është mirë që pas kësaj Kosova të provojë se është shtet ligjor, duke dëshpëruar dhe ata që nuk duan dhe nuk ja kanë njohur lindjen dhe rritjen e saj që nga 1999, duke e parë gjithnjë si konspiracion dhe jo si realitet. Është koha që Kosova dhe Albini të njohin njëri-tjetrin.