“Pastrimit” i skadon kontrata, Batllavën e mbulojnë mbeturinat

Hapësirat përreth liqenit të Batllavës në fshatin Orllan të Podujevës janë mbuluar nga mbeturinat. Projekti i përbashkët Komisioni Evropian-Komuna e Podujevës i gjashtë plazheve ka mbetur pa mirëmbajtje qe një muaj prej kur kompanisë “Pastrimi” i ka skaduar afati i kontratës. Menaxheri i KRM “Pastrimi”,

Shaban Beselica, ka thënë se pas skadimit të kësaj kontrate më ata nuk janë përgjegjës për pastrimin e hapësirave përreth liqenit të Batllavës, por vetëm për bartjen e mbeturinave nga kontejnerët e vendosur në vende të caktuara.

“Nuk kemi më kontratë me Komunën e Podujevës për pastrimin e hapësirave publike përreth liqenit të Batllavës. Kontrata është ndërprerë kur ka skaduar afati i kontratës”, ka thënë Beselica. Sipas tij, deri tashti nuk kanë bërë ndonjë marrëveshje me Komunën e Podujevës. “Ne kemi përgjegjësi vetëm për të zbrazur kontejnerët kur mbushen, por jo edhe me pastrua hapësirat”, ka thënë menaxheri i KRM “Pastrimi”.

Edhe drejtori për Shërbime Publike, Mbrojtje dhe Shpëtim, në Komunën e Podujevës, Faik Muçiqi, ka thënë se hapësirat përreth liqenit të Batllavës nuk pastrohen nga askush prej kur ka skaduar afati i kontratës me kompaninë “Pastrimi”. Ai ka theksuar se ka qenë në pushim dhe nuk ka mundur të merret me këtë çështje deri tash.

“Po ka kaluar afati i kontratës. Njëherë nuk kemi marrëveshje me askënd për të pastruar këto hapësira, sepse duhet të shkojë nëpërmjet Kuvendit për të vazhduar kontratën”, ka theksuar Faik Muçiqi. Drejtori për Shërbime Publike, Mbrojtje dhe Shpëtim, ka thënë se ata po kritikohen edhe kur po bëjnë kontratë edhe kur po ndërpritet kontrata.

“Kontejnerët zbrazen, ndërsa hapësirat nuk pastrohen se nuk kemi kontratë… Kur po bëjmë kontratën po reagojnë, kur nuk po e bëjmë po reagojnë, ne jemi në telashe”, është shprehur drejtori Muçiqi. “Duhet të shikojmë se çfarë metode të përdorim, a do të shkojmë nëpërmjet tenderimit, apo vazhdimit të kontratës, tash për tash nuk e di.

Ose duhet të bëhet me rojë e me pastrim si ka qenë, ose ta bëjmë edhe për të mbledhur dhe bartur mbeturinat. Mirë do të ishte sikur të ishin të gjitha bashkë. Nëse në këtë seancë nuk vendoset, atëherë duhet të gjejmë edhe ndonjë mënyrë të veçantë për kontratë të veçantë, vetëm për liqenin e Batllavës, të paktën për sezonin e verës”.

Faik Muçiqi ka thënë se bashkë edhe me Drejtorinë e Planifikimit Urban dhe Mbrojtje të Mjedisit do të shikojnë se çfarë mënyre do të përcaktojnë për të mirëmbajtur gjashtë plazhet e liqenit të Batllavës. /Telegrafi/