Nuk ka medium publik në Kosovë!

Pse disa tema politike dhe ekonomike që vërehen shumë lehtë në shtetin “tonë” nuk bëhen temë diskutimi e nuk trajtohen në media? Pse disa tema e “probleme” të parëndësishme bëhen kryelajm e temë diskutimi në media?

“Mediat vendosin se cila temë do jetë temë diskutimi dhe cila do të tërheqë vëmendjen në opinion. Këto vendosin se cilës temë do t’i japin prioritet e cilës jo”, kështu thonë McCombs dhe Shaw.

A e keni parë se sa përparësi i jep RTK-ja e PDK-së dhe e EULEX-it, “problemeve” që kanë për subjekt trajtimi prapashtesën “viq”. Pra, pikënisje e lajmit dhe temave të RTK-së, përsëri është nacionaliteti. E, përsëri [do gjë që sillet rreth kësaj pakice. Fjala është për serbët. E, ku janë pakicat tjera? Ku janë turqit, boshnjakët, ashkalinjët, kroatët?

Sa e tmerrshme, ky televizion, servil i UNMIK-ut, dhe sot i mbeturinave të tij, përpos që prodhoi lajme etnikisht selektive dhe manipuluese, ndihmoi edhe në ndërtimin e një fotografie të rrejshme e johistorike për Kosovën. E, si pasojë e këtij opinioni, të prodhuar enkas nga “spin doktorët” e të gjitha shteteve e kabineteve që kultivojnë marrëdhëniet me publikun, kemi edhe copëtimin e territorit të Kosovës së vogël.

Mediat e Thaçit nuk trajtojnë kapitullimin total të politikës dhe ekonomisë së Kosovës. Jo, këto media “alla Putin” më me turr e më me qejf e trajtojnë “një pordhë me gazep” të Zhivoradit, sesa ikjen e mijërave Albanëve, Agronëve, Teutave, Shpresave, Kujtimëve, Shqipeve, që sot kanë mësyrë Perëndimin për të fituar bukën e gojës.

Nuk ka medium publik në Kosovë!

Nuk ka, sepse për të qenë publik, duhet të dish të përfaqësosh e të kultivosh interesat e publikut. Nuk ka televizion publik, sepse për të qenë publik, duhet të mos jesh skllav i partisë dhe “analistëve ndërkombëtarë”.

Nuk ka RTK publik, sepse vet partia në pushtet nuk është publike. Nuk ka RTK publik, sepse vet kryeministri i Kosovës nuk është publik, nuk është i popullit. Nuk ka RTK publik, sepse kjo “shtëpi e Hiçkokut” nuk ishte e sinqertë dhe profesionale me lajmin politik. Lajmi i prodhuar nga kjo “shtëpi publike”, nuk reflekton gjendjen e mjerë e të vërtetë të këtij shteti.

S’ka të vërtetë politike, s’ka të vërtetë kulturore e as ekonomike. S’ka! S’ka! S’ka!

Para 10 vitesh e pata thënë, dhe e them përsëri: Pa ndihmën e RTK-së, shumica e politikanëve nuk do ishin politikanë, por çobanë.