Nga greva në protestë para Qeverisë (Foto)

Ish-punëtorët e Fabrikës së Tubave, kanë protestuar para Qeverisë, nga e cila po kërkojnë që sa më shpejtë t’i emërojnë anëtarët e Bordit në Agjencinë Kosovare të Privatizimit (AKP).

“Kryeministër, zbato Kushtetutën. Kryeministër, heq dorë nga kapja e shtetit”, këto janë disa nga pankartat të cilat po i mbajnë në duar protestuesit, raporton ORAinfo.

Ndryshe, nga 27 maji i vitit të kaluar, ish-punëtorët e Fabrikës së tubave patën hyrë në grevë për shkak të mos ekzekutimit të vendimit të Qeverisë së Kosovës për kompensimin financiar në vlerë mbi 25 milionë euro.

Edhe pse ish-kryeministri i Qeverisë së Kosovës, Hashim Thaçi, në atë kohë u pat premtuar që kërkesat e tyre do të realizohen, ato vazhdojnë të mbesin ende të papërmbushura. E gjithë kjo po ndodh për shkak se AKP-ja, e cila duhet të bëjë ekzekutimin e vendimit të Qeverisë, ende nuk e ka të kompletuar bordin.
Tani, punëtorët e kësaj Fabrike që një kohë të gjatë janë duke kërkuar krijimin e bordit të AGP-së në mënyrë që procesi i kërkesave të tyre të realizohet më shpejt. /Telegrafi/