Opinione

Mashtruesi në detyrë

Para më shumë se një muaj, në periferi të Prishtinës u bë një ndejë e madhe. Pjesëmarrës në aheng ishin dhjetëra përfaqësues të sistemit prokurorial dhe atij gjyqësor. Sebep që ajka e drejtësisë të mblidhej në një hotel ishte Enver Hasani. Pasi ai po e përmbyllte mandatin si kryetar i Gjykatës Kushtetuese, kryetari i Gjykatës Supreme, Fejzullah Hasani, e kishte parë të udhës që ta organizonte për të një ceremoni lamtumirëse.

Organizimi shkoi si më së miri, ndonëse sot e kësaj dite askush nuk dha sqarime pse Hasani i Supremes e bëri gjithë atë shpenzim për një zyrtar që deri atëherë e kryesonte një gjykatë krejt tjetër e që në fakt s’kishte të bënte asgjë me gjykatat e tjera.

Por, kjo ka më pak peshë në krahasim me rrethanën kur u organizua ndeja.

Një muaj më herët, Enver Hasani ishte ftuar nga Gjykata Themelore në Prishtinë që të paraqitej në Departamentin për Krime të Rënda për shkak të veprave penale: “falsifikim i dokumentit zyrtar dhe keqpërdorim i pozitës dhe autoritetit zyrtar”.

Pra, në kohën sa po qëndronte aty, ai dyshohej për dy vepra: një të kryer në kohën kur ishte rektor dhe tjetrën në kohën sa ishte gjyqtar kushtetues.

Me veprën e dytë e ngarkonte Avokati i Popullit. Ai pretendonte se Hasani, bashkë me kryetaren e tashme të Kushtetueses, Arta Rama-Hajrizi, kishin vënë mbi një vendim nënshkrimin e gjyqtarit kushtetues amerikan, Robert Carolan, me qëllim qe ta përligjnin hedhjen poshtë të lëndës së ngritur prej tij, lidhur me (pakushtetutshmërinë e vendimit të presidentes Jahjaga, për vazhdim të mandatit të tre gjyqtarëve ndërkombëtarë.

Derisa Prokuroria Speciale ende nuk e kishte marr rastin, Avokati i Popullit publikisht u ankua se presidentja e Kosovës, Atifete Jahjaga, përfaqësuesi special i Bashkimit Evropian, Samuel Zhbogar. dhe shefi i Misionit EULEX, Gabriele Meucci, po i pengonin hetimet që ishin duke u zhvilluar lidhur me dyshimet për shkelje ligjore dhe kushtetuese të kryera nga Hasani.

Pavarësisht këtyre zhvillimeve, Hasani po i jepte fund mandatit në Kushtetuese duke qëndruar në mesin e atyre njerëzve që parimisht do të duhej ta vënin në bankën e të akuzuarit.

Njëri nga të pranishmit, i cili ishte në ndejë si anëtar i Këshillit Prokurorial, le që nuk shihte asgjë të keqe që i cakërronte gotat me një të dyshuar për falsifikim, por haptas e pranonte se do të ndihej keq sikur të mos ftohej në atë ceremoni.

Për fat të keq ai nuk jeton në një vend si Japonia. Atje, ish-ministri i Drejtësisë, Keishu Tanaka, kishte paraqitur dorëheqje vetëm pse kishte pranuar se kishte qenë i ftuar nderi në dasmën e një pjesëtari të mafisë japoneze, Yakuza, 30 vjet më parë.

Prokuroria Speciale bëri mirë që i mori për bazë dëshmitë e ofruara nga Avokati i Popullit, por Hasani e Rama-Hajrizi nuk u paraqiten asnjëherë në gjykatë duke u thirrur në imunitetin kushtetues.

Për lëndën e ngritur nga Avokati i Popullit, Hasani edhe mund ta bëjë këtë gjë, pasi lidhet me fushëveprimin e tij si gjyqtar kushtetues, por imuniteti nuk i hynë në punë në aktakuzën që ka ngritur tash Prokuroria Speciale për veprën e parë, “Mashtrimi në detyrë”, në kohën sa ka qenë rektor i Universitetit të Prishtinës.

Hasani ka vjet që i ka zhveshur nga imuniteti deputetët, ministrat, por edhe vet kreun e shtetit në rastet e ndjekjeve penale që nuk lidhen me fushëveprimtarin e tyre. Zhveshja nga imuniteti tash duhet të vlejë edhe për të.

Nëse konfirmohen pretendimet e prokurorisë se ai bashkë me dy persona të tjerë kanë falsifikuar kontratën origjinale, “Përkthimi i librave nga gjuha angleze në gjuhën shqipe, për nevojat e Universitetit të Prishtinës”, me qëllim të përfitimit të kundërligjshëm të dobisë pasurore, atëherë del se Hasani është një falsifikator kronik.

Hasani, për shumë vjet është ndier padron i ligjit në Kosovë. Atij nuk iu tërhoq vërejtja kur e shpërfilli Kuvendin e Kosovës dhe e mori të drejtën që t’u kërkonte drejtpërdrejtë presidentit të atëhershëm të Komisionit Evropian, Jose Manuel Barroso, dhe ish-zyrtares së lartë të BE-së për Politikë të Jashtme, Catherine Ashton, vazhdimin e mandatit të tre kolegëve ndërkombëtarë, sikundër që nuk iu tërhoq vërejtja as atëherë kur e pranoi kthimin e kundërligjshëm të Carolanit në gjykatë, edhe pse Ligji për Gjykatën Kushtetuese e ndalonte kategorikisht çdo kthim pas dorëheqjes.

Hasani nuk ka dhënë llogari që bashkë me të tjerët e kanë thyer parimin e shumicës parlamentare, që kanë gjykuar me kute të dyfishta dhe që e kanë zhvatur pamëshirshëm buxhetin.

Të tillë Gjykatës Kushtetues nuk i janë dashur e as nuk i duhen vendit!

Hasani gjatë gjithë kohës ka folur në emër të ligjit, prandaj në emër të ligjit duhet të përgjigjet edhe për akuzat që rëndojnë mbi të.