KFOR-FSK, marrëdhënie që duhet të normalizohen sa më parë

-Armët e FSK-së në radhë të parë duhet të përdorën për sovranitetin e Kosovës. Defilimi me to në qendër të Prishtinës kur çereku i atdheut është jashtë kontrollit të institucioneve të Kosovës është një sjellje mburravece.
-Edhe kur Kosova të jetë anëtare e Kombeve të Bashkuara, e madje edhe kur Kosova të jetë anëtare e BE-së dhe NATO-s, nuk është fort e hijshme që të shes poza si shtet i pavarur e sovran.

Në kohën kur pritej që strategjia për Veriun e Kosovës të përmirësohet dhe në të të kyçën sa më shumë faktorë relevantë, ndodhi një incident plotësisht i panevojshëm: ngrirja e marrëdhënieve KFOR-FSK. Kjo ndodhi për arsye shumë të kotë: manifestim me armë në qendër të Prishtinës për shënimin e rënies heroike të Jasharajve.

Shumëkush e kupton dëshirën e zjarrtë të Kosovës dhe institucioneve të Kosovës për t’u dukur si shtet. Por çështja qëndron në atë se është më e rëndësishme të bëhesh vërtet shtet se sa t’i bësh vetes qejfin të dukesh si shtet. Kosova e njohur nga 1/3 e kombeve të botës akoma nuk duhet ta ketë luksin të shes poza se është tashmë shtet i pavarur. Edhe kur Kosova të njihet nga 2/3 e kombeve të botës, e rrjedhimisht të jetë anëtare e Kombeve të Bashkuara, e madje edhe kur Kosova të jetë anëtare e BE-së dhe NATO-s, nuk është fort e hijshme të shes poza si shtet i pavarur e sovran.

Edhe një kohë të gjatë si shtet i vogël i krijuar rishtaz Kosova do të ketë nevojë për politikë të urtë e të matur që do ta shpijë hap pas hapi drejt synimeve të saj. Në këtë kuadër Kosova ka nevojë jetike për organizmat ndërkombëtarë dhe për ndihmën e tyre pavarësisht qëndrimit të tyre karshi pavarësisë dhe sovranitetit të saj. Kosova ka nevojë që të pranojë të gjithë kompromiset e pakëndshme që nuk e pengojnë synimin e saj strategjik në perspektivë për tërësi territoriale, liri, pavarësi, demokraci e mirëqenie.

Nga të gjithë organizmat ndërkombëtarë, KFOR-i është më thelbësori për synimet e Kosovës dhe kësisoj marrëdhëniet me të nuk guxojnë të rrezikohen as edhe për një moment të vetëm.

Armët e FSK-së në radhë të parë duhet të përdorën për sovranitetin e Kosovës. Defilimi me to në qendër të Prishtinës kur çereku i atdheut është jashtë kontrollit të institucioneve të Kosovës është një sjellje mburravece që nuk tregon asgjë pozitive.

Respekti për sakrificën e Jasharjve, përkatësisht për ditën që mund të konsiderohet si ditë e kryengritjes sonë apo luftës për liri nuk është e thënë të dëshmohet me defilim armesh siç e bëjnë zakonisht shtetet sovrane.

Shtetet që ditët e tyre të rëndësishme i shënojnë me parada ushtarake t’paktën kanë se çfarë tregojnë: tanke, avionë supersonikë, raketa tokë-ajër etj. Por me çfarë defiloi Garda e FSK-së? Me pushkë e me revole! Me ato që mjaftuan për ta nisur luftën, por që nuk mjaftuan për ta fituar atë. Për ta fituar luftën u deshën avionët e NATO-s që ne s’i kishim.

Prandaj është e rrugës që të mos i shesim mend NATO-s, përkatësisht KFOR-it. Respektin për sakrificën e Jasharajve ne mund t’ua imponojmë të tjerëve vetëm me sjellje të urta.

Tani ndodhi çfarë ndodhi dhe institucionet e Kosovës nuk guxojnë të përsëritin veprime të tilla të panevojshme e të padobishme. Dikujt nga personalitetet relevante i takon që në emër të institucioneve të Kosovës t’i kërkojë falje publike KFOR-it për “mos koordinim adekuat”, ndërsa të gjithë bartësit e institucioneve duhet të punojnë në normalizimin e marrëdhënieve KFOR-FSK që të vazhdohet puna aty ku ka mbetur.