Kadare: “Shqipëria të shkojë mirë këtu, dhe Shqipëria të shkoj mirë atje”

Shkrimtari i shquar, Ismail Kadare, tha të enjten gjatë një takimi me lexuesit e veprës së tij në qytetin e Shkodrës se, vetëm disa javë pas shpalljes së Pavarësisë së Kosovës, kombi shqiptar tashmë gjendet në një situatë të pazakontë.

“Nga një vend që ishim mësuar të kishim një atdhe dhe që quhej Shqipëri, tashmë jemi bërë me dy shtete shqiptare dhe kjo ka filluar të veprojë në ndërgjegjen tonë. Kombi shqiptar tani ka dy shtëpi. Të kesh dy shtëpi është e ndryshme se sa të kesh një shtëpi. Kjo është banale në pamje të parë, por kur shtëpi quhet ai vend që ne na e ka dhënë fati, dhe fati vjen një herë në jetë, pra kur një komb strehohet në dy shtëpi diçka ndryshon për të mirë. Kjo ndihet në kulturën e tij, në tregun e parë të përbashkët të kombit që është kultura dhe në kulturë bën pjesë gjithashtu libri”, ka thënë Kadare.

Kadare, tha gjatë këtij takimi me lexuesit shkodran se nuk shqetësohej në lidhje me tezat e “Shqipërisë së Madhe” apo, të “Shqipërisë së Vogël”, pasi që kjo sipas tij është vetëm forma e jashtme e çështjes.

“E rëndësishme është që këto dy shtete shqiptare e rritin shumë shtatin e kombit shqiptar, i japin shtatin natyral të tij. Nuk është më keq, as për ne, as për ata, por për mendjen e tyre të ngushtë, me prirje antishqiptare ose jo dashamirëse ndaj Shqipërisë. Jam i sigurt se dy Shqipëri ju duken më keq se një Shqipëri e Madhe, e ashtuquajtur e Madhe. Dhe prapë, jam i sigurt dhe besoj se do të vijë koha që do të jenë të parët që do të propozojnë që, këta shqiptarët, që u shtrinë në dy shtete, sikur të mblidheshin në një do të ishte më mirë. Prandaj, unë e quaj këtë problem të paqenë, të parëndësishëm. E rëndësishme është që Shqipëria të shkojë mirë këtu dhe Shqipëria të shkojë mirë atje. Dhe që midis këtyre dy shteteve shqiptare të mos ketë mungesë uniteti, të mos ketë grindje”.

Kadare, foli në Shkodër edhe për qëndrimin ndaj flamurit të ri. “Kosova, është shteti që ka flamurin më evropian nga të gjithë të tjerët. Flamuri i Kosovës, tha ai, duket si një bir i flamurit të Bashkimit Evropian. Kosova është një shtet si gjithë të tjerët. Shumica e shteteve evropiane janë multietnike, por tashti Kosovës kjo i theksohet për arsye të kushteve politike kur u krijua, të reaksionit kundër pavarësisë së saj etj. Më thoni një shtet unietnik në Evropë ? Nuk ka asnjë. Të gjithë janë multietnik. Prandaj, askënd nuk duhet ta shqetësojë ky theksim, qoftë edhe i tepruar, i multietnicitetit të shtetit të Kosovës. Ky është një shtet shqiptar, me shumicë absolute shqiptare, ku është vënë në provë toleranca e shqiptarëve. S’ka asgjë të keqe. Më pas do të tregohet si proverbiale se shqiptarët e dhanë tolerancën maksimale për etnitë e tjera dhe, nuk humbën asgjë. Askush nuk do të humb, veç do të fitojnë të gjithë”, ka vlerësuar shkrimtari ynë me renome ndërkombëtare.

Ne takimin me lexuesit e veprës së tij në qytetin e Shkodrës, shkrimtari Ismail Kadare është përgjigjur edhe në shumë pyetje në lidhje me veprën e tij dhe, në përgjithësi, për letërsinë shqipe.