Investitorët bullgar kërkojnë treg në Kosovë

Një delegacion i bizneseve nga Bullgaria, kanë vizituar Zyrën e Komunitetit të Biznesit-Kuvendi i Kosovës, ku janë pritur nga kryesuesi Agim Shahini, nga i cili janë njoftuar rreth mundësive, legjislacionit dhe gjërave të tjera për investime.

Investitorët nga Bullgaria u interesuan për mundësitë e investimeve në fusha të ndryshme si në atë të ndërtimtarisë, infrastrukturës, në ujëra të zeza, energji, riciklimi i mbeturinave e sfera tjera dhe të cilët kërkojnë bashkë investitorë vendës.

Agim Shahini, kryesues i Zyrës së Komunitetit të Biznesit të Kuvendit të Kosovës, i informoi mysafirët për rëndësinë e funksionalizimit të kësaj zyre, si model i ri në Evropën Juglindore, e cila bashkon dhe rrit dialogun ndërmjet komunitetit të biznesit dhe deputetëve për të mirën e vendit.

“Zyra e Komunitetit të Biznesit dhe Aleanca Kosovare e Bizneseve, janë të interesuar që të thithin sa më shumë investitorë të jashtëm, të cilët vijnë për përfitime në Kosovë dhe kur të kthehen të jenë të kënaqur me interesin”, tha Shahini.

Ai i njoftoi mysafirët se është duke u bërë një reformë e dobishme ligjore për lehtësira të bërjes së biznesit, zhvillimit ekonomik ku edhe është duke u ndryshuar edhe Ligji për Investimet dhe ligjet tjera.

“Gjendja e ekonomike në Ballkanin perëndimor është duke u vështirësuar nga pengesat më shumë burokratike, e këto po vështirësohen me tarifa të rënda politike, që në shumicën e rasteve po ndikojnë në uljen e interesimit të investitorëve në tërë regjionin. Kjo është e dëmshme për të gjitha palët, sidomos për bizneset të cilat janë të kufizuara për shkak të paqartësive që i prodhojnë disa lider politik kundër ndonjë vendi të caktuar”, tha Shahini.

Sipas tij Kosova është treg i hapur, liberal për investime dhe pa pengesa për askndë dhe në kuadër të saj legjislacioni i Kosovës po bënë ndryshime në ligjet që kanë të bjënë me lehtësira për investitorët e potencial.

Vendi ofron potencial të jashtëzakonshëm njerëzor dhe shumë të aftë për punë dhe që janë asetë shumë i rëndësishëm për investimet e huaja. “Zyra e Komunitetit të Biznesit në Kuvendin e Kosovës sikur AKB-ja dhe asociacionet tjera do të jenë në shërbim të të gjithë komunitetit të biznesit dhe investitorëve që do të vijnë në Kosovë”, tha kryesuesi i zyrës.

Georgi Georgiev, kryesues i delegacioni nga Bullgaria, tha se janë në Kosovë për të shikuar mundësitë për investimeve në fusha të ndryshme, duke nisur në ndërtimtari, infrastrukturë, në ujëra të zeza, energji, riciklim të mbeturinave e tjera.

Ai kërkoi bashkë investitorë në këto fusha në përqindje të barabartë me bizneset nga Kosova, e që kompania Fazita ishte njëra nga kompanitë që i ofroi një mundësi për të bashkë investuar.

Vizita e delegacionit bullgar u ndërmjetësua edhe nga Ambasada e Kosovës në Bullgari. /Telegrafi/