I akuzuari i drogës në vaj palme kërkon lirinë

Gjykata e lartë, brenda pak ditësh do të shqyrtojë kërkesën e të pandehurit Dhimitros Harizaj, i akuzuar për trafikimin e një sasie prej 200 kg kokainë nga Kolumbia drejt Shqipërisë dhe do të vendosë për fatin e tij.

Harizaj akuzohet për trafikimin e sasisë së madhe të kokainës kolumbiane. Ai porositi vaj palme në Spanjë dhe sipas policisë, në vaj ishte tretur sasia prej 200 kg kokainë. Nga hetimet rezulton se në Spanjë do të bëhej përzierja me vajin e palmës.

Kamioni me vajin e palmës u bllokua në Gjirokastër, ku do të dorëzohej në një fabrikë kroasantësh. Në pranga ra Harizaj, pasi rezultoi se ishte porositësi i vajit të palmës. Ai deklaroi në gjykatë se nuk kishte aspak lidhje me trafikun e drogës dhe nuk kishte dijeni që në vaj ishte tretur kokainë.

Sasia e drogës nuk mbërriti asnjëherë në Shqipëri, pasi autoritetet belge e bllokuan në vendin e tyre dhe në vaj lanë një sasi të vogël, vetëm për të zbuluar rrjetin. Ky fakt duket se është një argument mjaft i fortë për Vullnet Harizajn që ta binde gjykatën për t’i dhënë lirinë, raportoi BW./Telegrafi/