Ekonomia ilegale, Italia kryeson në BE

Prej disa muajsh po përdoret zyrtarisht edhe termi Prodhim i Brendshëm Bruto “i keq”, që mat vlerën ekonomike të drogës, prostitucionit dhe kontrabandës. Rregulli i ri, që deri më tani ka “injoruar” statistikat zyrtare, hyri në fuqi në shtator të këtij viti në shumë vende Europiane dhe llogaritet në pasurinë kombëtare të një vendi. Në vijim po japin disa shifra për vendet kryesore europiane, referuar të dhënave të instituteve respektivë të statistikave.

Italia mban vendin e parë sa i përket ndikimit të aktiviteteve të paligjshme në performancën ekonomike. Bëhet fjalë për rreth 15.5 miliardë euro, ose 0.9 për qind e Prodhimit të Brendshëm Bruto. Tregtia e drogës në Itali llogaritet në rreth 10.5 miliardë euro, prostitucioni 3.5 miliardë dhe kontrabanda 300 milionë euro. Ndërsa në Spanjë, ekonomia ilegale llogaritet në 0.87 për qind të GDP-së, ose 9.4 miliardë euro. Në krye është trafiku i drogës, ndërsa prostitucioni përfaqëson 0.35 për qind.

Vendi i tretë për Holandën. “Coffee shop” ose dyqanet ku shitet hashash, janë një faktor i rëndësishëm për ekonominë holandeze, referuar të dhënave zyrtare të Zyrës së Statistikave. Vlera e shtuar në ekonomi, nga tregu i kanabis është 1.03 miliard euro. Ndërsa në total, tregu ilegal në Holandë llogaritet në 2.63 miliardë euro.

Droga dhe prostitucioni i japin një shtysë Prodhimit Kombëtar të Britanisë, me rreth 10.5 miliardë euro ose 0.7 për qind të GDP-së. Nga kjo shumë rreth 8.4 miliardë euro vijnë nga tregu i drogës dhe pjesa tjetër nga prostitucioni, raporton Scan Tv.

Ndërsa Franca llogarit një vlerë të aktiviteteve të paligjshme prej 2 miliardë euro ose 0.1 të Prodhimit të Brendshëm Bruto. Edhe në Gjermani, ashtu si një Francë, tregu i drogës vlen 1.52 miliardë euro, ose 0.1% të GDP-së. /Telegrafi/