Opinione

Edi…

E majta në Shqipëri ka fituar jo si rezultat i një opozitarizmi pragmatik, duke treguar vlera të një demokracie të mirëfilltë, por pikërisht për shkak të dështimit të së djathtës.

Jam i sigurt se po të kishte qenë e majta opozitë pragmatike, nuk do të kishte dështuar kaq thellë e djathta. Por, realisht nuk do të kishte stagnuar Shqipëria në proceset politike, ekonomike dhe sociale.

Prandaj, e majta është votuar nga qytetarët në mungesë të një fryme reale demokratike në Shqipëri. Nuk është votuar sa i përket programit të saj. Ajo është votuar sepse qytetarët e Shqipërisë tashmë kanë qenë të lodhur nga Sali Berisha dhe qeverisja e tij, e cila tashmë pati uzurpuar dhe kufizuar lirinë e tyre politike dhe socio-ekonomike.

Edi Rama e ka kuptuar se fitorja e së majtës kundër të djathtës ka qenë shumë e lehtë, më e lehtë se që ka parashikuar edha ai vet. Prandaj, tendenca e disa “analistëve” për ta bërë faktor kryesor Ilir Metën, nuk qëndron. Tendenca e tillë ka për qëllim të prodhojë një opozitë brenda pozitës, gjë që për mendimin tim nuk është analitik, as i moralshëm dhe as profesional.

Rama ka kuptuar se më lehtë e ka mundur Saliun, sesa të qeveriste me shtetin. Qeverisja do të jetë shumë më e vështirë, do të ketë shumë punë, sidomos në pavarësimin e plotë të sistemit të drejtësisë, i cili do të jetë baza e demokracisë dhe zhvillimit ekonomik të vendit.

Edi Rama në fillim do të tregojë se a do të jetë politika harmoni e interesave në favor të interesave individuale dhe grupore, apo harmoni e interesave në favor të interesave të qytetarëve. Dhe, kjo do të dihet me zgjedhjen e njerëzve nga ai në përbërjen e qeverisë.

Me një qeverisje racionale funksionale dhe demokratike brenda shtetit, do të ndikojë që proceset politike të qarkullojnë pozitivisht në rrjedhat e mëtutjeshme të Shqipërisë në politikën e jashtme dhe në integrimet evropiane.

Edi duhet ta dijë se demokracia do të lulëzojë vetëm nëse menaxhon pasurinë e shtetit dhe taksapaguesve shqiptarë në interes të tyre. Edi duhet ta dijë se demokraci funksionale do të thotë sistem i pavarur i drejtësisë, zhvillim ekonomik dhe mirëqenie sociale për qytetarët, që nënkupton liri politike dhe socio-ekonomike për qytetarët dhe integrim më i shpejtë në BE.

Ai duhet urgjentisht ta pavarësojë sistemin e drejtësisë nga ekzekutivi dhe legjislativi. Drejtësia do të ketë për detyrë të zbulojë dhe ndëshkojë përgjegjësit dhe vrasësit viktimave të protestave të vitit 2011 dhe rasteve të tjera kriminale – ku dyshohen se janë inkriminuar qarqe të politikës – më qëllim që të triumfojë demokracia.

Në rast se nuk zbulohen ata, atëherë secili që do të vije në pushtet për ta mbajtur atë, do të marrë jetë njerëzish, e kjo do të thotë se rotacionet politike do të dyshohen se bëjnë marrëveshje në prapaskenë për ta mbrojtur njëri-tjetrin në emër të “stabilitetit të vendit dhe demokracisë”.

Shpresoj që në qeverisjen e Edit do të triumfojë demokracia funksionale, edhe pse me shpresë dhe me optimizëm deri sot nuk është rregulluar asgjë. Çdo gjë rregullohet me punë konkrete.