Diplomacia serbe në “knock down”

Beogradi zyrtar ka hasur një reagim të ashpër pas hartimit të një rezolute të re në OKB pa marrëveshje me SHBA-të dhe vendet kryesore të BE-së, pasi Gjykata Ndërkombëtare të Drejtësisë vendosi këtë muaj se shpallja e pavarësisë së Kosovës nga Serbia nuk ishte e paligjshme.

Kosova përsëri është vendosur në epiqendër të zhvillimeve të reja në botë menjëherë pas “tërmetit” medial pas thyerjes së sekretit të mijëra dokumenteve zyre të Ushtrisë amerikane në kohën kur president i SHBA-ve ishte George W. Bush.
Në gazetën irlandeze Irish Times online të shtunën, 30 korrik 2010, autori DANIEL McLAUGHLIN në tekstin e titulluar “Serbia përpiqet në OKB për të shmangur shkëputjen e Kosovës”, vë theksin se Serbia ka dërguar një projekt-rezolutë në OKB, për shqyrtim nga Asambleja e Përgjithshme e saj në shtator, në të cilën thuhet se “shkëputja e njëanshme nuk mund të jetë një mënyrë e pranueshme e zgjidhjes së çështjeve territoriale” dhe “bën thirrje të gjitha palëve të përfshira për të gjetur një zgjidhje të pranuar reciprokisht…, nëpërmjet dialogut paqësor në interes të paqes, sigurisë dhe bashkëpunimit në rajon”.

Krerët e Serbisë thonë se vendimi do të inkurajojë grupe separatiste anembanë botës, ndërsa mbështetësit e pavarësisë së Kosovës, e cila është njohur nga 69 shtete, përfshirë 22 nga 27 anëtarët e Bashkimit Evropian – thonë se Kosova është një rast i veçantë që nuk ka vendosur një precedent ligjor. Edhe pse Serbia ka kërkuar në mënyrë eksplicite bisedime të mëtejshme për statusin e Kosovës dhe zgjidhjen e saj, qeveria e Republikës së Kosovës thotë se Beogradi refuzon të pranojë vendimin e këshillues i GJND-së dhe është e vendosur për të minuar sovranitetin e Kosovës. Po ashtu Prishtina zyrtare kërkon të bindë më shumë vende për të njohur sovranitetin e saj në një shtytje për anëtarësim në OKB.

“Serbia nuk ka asnjë qëllim, ose interes, për të hyrë në konflikt me bashkësinë ndërkombëtare, por, si çdo vend tjetër, ajo ka linjat që nuk mund të kalojë”, citohet të ketë thënë presidenti serb Boris Tadic. Ai kishte shtuar se rezoluta e OKB-së është hartuar “të mos shpërndahet flaka, por të kontribuojë për një zgjidhje paqësore dhe të matur përmes dialogut, në të cilën secila palë do të fitojë diçka dhe të humbasë diçka”.
Përkundruall presidentit serb, Ministri i Jashtëm i Kosovës, Skënder Hyseni, ka thënë se “çdo orvatje për ta paraqitur Kosovën si një precedent në fakt është një përpjekje për të minuar shtetin e Kosovës, një përpjekje për të penguar përparimin e Kosovës në arenën ndërkombëtare…”. Ai ka thënë se dhjetëra vende janë të gatshme për të njohur sovranitetin e vendit në muajt e ardhshëm, të inkurajuara nga vendimi i GJND-së, si dhe mbështetja e shumicës së BE-së, SHBA-ve dhe Japonisë.

Kina, Rusia dhe anëtarët e BE-së – Spanja, Greqia, Rumania, Sllovakia dhe Qipro, janë ndër ato vende që e kanë mbajtur në distancë njohjen, derisa Moska vazhdon kërcënohet se do të përdorë veton në Këshillin e Sigurimit të OKB-së e për të bllokuar anëtarësimin e Kosovës në OKB.