Dënohet me 6 vjet e pesë muaj me burg

Anton Stanaj, shqiptari nga Mali i Zi i njohur edhe si një nga njerëzit më të fuqishëm të biznesit, i biri i Rok Stanajt të kompanisë “Rokshped” është shpallur fajtor nga trupi gjykues në Gjykatën Speciale në Beograd.

Ai është dënuar me gjashtë vjet e gjysmë burg dhe me 100 mijë euro gjobë që duhet ta paguajë, në të kundërtën do ta vuajë me burg edhe pjesën tjetër. Kryetarja e trupit gjykues, Snezhana Jovanoviq, ka lexuar për më shumë se dy orë arsyetimin e vendimit dhe ka thënë se grupi i udhëhequr nga Stanaj ka krijuar një rrjet të fuqishëm të shpërndarësve dhe personave që kanë marrë pjesë në kontrabandën e duhanit në tërë territorin e Evropës Juglindore.

Ajo ka përmendur kompani të ndryshme fiktive nga Mali i Zi, por edhe kompani të regjistruara në Shtetet e Bashkuara të Amerikës, një kompani në Prizren dhe një në Qipro, si ndihmuese të këtij procesi. Stanaj, në procesin kundër të cilit janë përfshirë edhe 27 persona të tjerë, është konsideruar si udhëheqës i grupit dhe si një nga personat që ka blerë dhe ka ndihmuar në fshehjen dhe më pas ka organizuar dërgesat e duhanit që ilegalisht janë transportuar dhe u kanë ikur obligimeve doganore.

Ai është arrestuar në vitin 2007 në një aksion spektakular të filmuar edhe nga kamerat dhe është shoqëruar nga njësia speciale e policisë serbe. Ai dhe grupi i tij thuhet se kanë bërë kontrabandë dhe kanë dëmtuar buxhetin e shtetit serb përreth 20 milionë euro. Ndërkaq përveç faktit që të gjithë të akuzuarit janë shpallur fajtorë, ata janë dënuar edhe me para në vlerë prej 933 milionë dinarësh. Stanaj është dënuar me 10 milionë dinarë apo rreth 100 mijë euro. /Koha//Telegrafi/