Bankat deri në nëntor 81.3 milionë euro fitime

Në bazë të rezultateve financiare, viti 2015 po del të jetë më i miri që nga paslufta për bankat komerciale që operojnë në Kosovë. Në bazë të publikimeve të fundit të Bankës Qendrore të Kosovës, shihet se deri në fund të muajit nëntor të këtij viti, bankat arritën fitim neto jo më pak se 81.3 milionë euro, shifër kjo e pa arritur ndonjëherë nga sistemi bankar në Kosovë.

Viti 2015 po ashtu u karakterizua me rënie të ndjeshme të normave të interesit për kredi, që sipas raportit për informatat mujore të sistemit financiar të publikuar nga BQK-ja, shihet se norma efektive e intersit për kredi në muajin nëntor të këtij viti zbriti në 8.2%, krahasuar me 9.9% që ishte në muajin nëntor të vitit 2014.

Vlera e kredive në fund të muajit nëntor të vitit 2015 arriti në 2.01 miliardë euro, krahasuar me 1.86 miliardë euro që ishte në fund të muajit nëntor të vitit 2014, me rritje vjetore prej 8.3%. Po ashtu, rritje kishte edhe te depozitat e klientëve, vlera e tyre në fund të muajit nëntor të vitit 2015 arriti në 2.63 miliardë euro, krahasuar me 2.5 miliardë euro në muajit nëntor 2014, pra kishte rritje vjetore rreth 5%.

Norma efektive e interesit për depozita në muajin nëntor të vitit 2015 ishte 1%, që krahasuar me normën efektive të interesit në kredi paraqet dallim me 7.2 pikë përqindje. Kjo diferencë e lartë ka ndikuar që bankat gjatë këtij vitit të arrijnë fitime mjaft të larta. Derisa dallimi mes interesit në kredi dhe depozita do të jetë i lartë, bankat do të vazhdojnë të kenë shumë të hyra nga interesi dhe fare pak shpenzime për interes, raporton Gazeta Ekonomia.

Vlen të theksohet se ka rënie në numrin e të punësuarve në banka, ky numër në muajin nëntor të vitit 2015 është 3,387 punëtor në banka, krahasuar me 3,514 sa ishin në muajin nëntor të vitit 2014. /Telegrafi/