Prej vitesh dështon riasfaltimi i rrugës regjionale Ferizaj-Prishtinë, shkak inatet politike

Rruga regjionale Ferizaj-Prishtinë për çdo ditë po vazhdon ta vështirëson qarkullimin e qytetarëve si pasojë e gropave dhe përmbytjeve nga uji. Kjo ka nxitur reagimin të shumta gjatë ditëve të vikendit, me arsyetime se rruga është degraduar në masë të madhe. Ndonëse rrugët regjionale i takojnë nivelit qendror për investime, por në Komunën e Ferizajt kanë thënë se mos asfaltimi i kësaj rruge ka të bëj me inate politike.

Sa herë që ka të reshura të shiut dhe borës rruga regjionale Ferizaj Prishtinë përmbytet nga uji.

Selim Marevci, zëdhënës i Komunës së Ferizajt, ka thënë se një varg projekte që ishin në kompetencë të nivelit qendror nuk janë realizuar shkaku i inateve politike.

“Qytetarët tashmë e dinë se sikur të ishte kjo rrugë nën menaxhimin e Komunës do të asfaltohej shumë vite më parë, por niveli qendror nuk po e riasfalton atë për inate politike dhe kjo po i dëmton më së shumti qytetarët e Ferizajt. Sa i përket deputetëve në Kuvendin e Kosovës nga Ferizaj e kanë pasur mundësinë ta shtyjnë përpara këtë projekt, por një gjë e tillë nuk ka ndodhur”, ka thënë midis të tjerash Marevci.

Gentrit Gashi, banor dhe përfaqësues i një biznesi në këtë rrugë, ka thënë se po përballen me dëmtim të automjeteve.

“Nuk e di pse gjithë ai buxhet i Qeverisë së Kosovës nuk është shpenzuar deri tash kur ne për çdo ditë po qarkullojmë nëpër baltë e nëpër gropa. Kjo është shqetësuese për të gjithë neve”, është ankuar ai.

Ndërkohë reagime ka pasur edhe nga shoqëria civile në këtë komunë.

“Gjendja e kësaj rruge është shumë e rëndë dhe e rrezikshme për të gjithë pjesëmarrësit në trafik.Kjo rrugë e pa përfunduar dhe mungesa e mirëmbajtjes prej katër vitesh ka krijuar telashe të vazhdueshme për të gjithë qytetarët dhe vizitësit. Dëmet që po u shkaktohen automjeteve janë të mëdha si pasojë e neglizhencës dhe dështimit të institucioneve përkatëse, pra përgjegjësia për mirëmbajen dhe përfundimin e kësaj rruge I takon ministrsië së infrastructures e cila deri më t ash ka dështuar të marrë veprime konkrete për zgjidhjen e këtij problem madhor për Ferizajn. Apelojmë urgjentisht të merren masa të menjëherëshme për riparimin dhe përfundimin e këtij projekti”, thujet midis të tjerash në reagim.

MMPHI-ja prej disa javësh nuk u është përgjigjur pyetje të Telegrafit lidhur me degradimin e kësaj rruge. Por në vendimin e kësaj ministrie qartësohet se kjo rrugë do të ndërtohet pasi që ka nisur procesi i shpronësimit.  Lidhur me këtë çështje MMPHI-ja, nëpërmjet një njoftimi muaj më parë ka treguar se ka mbajtur edhe dëgjime me qytetar me qëllim të përmbushjes së kritereve ligjore. /Telegrafi/