Pse ishte një strukturë betoni në fund të pistës që goditi aeroplani i Koresë së Jugut?

Ekspertët e aviacionit po analizojnë një strukturë “të pazakontë” betoni pranë pistës së aeroportit dhe rolin e saj në aksidentin ajror të kompanisë koreano-jugore Jeju Air, ku humbën jetën 179 persona.

Në video, shihet që aeroplani doli nga pista, goditi një mur betoni dhe më pas mori flakë. Aksidenti ndodhi të dielën, më 29 dhjetor, në qytetin Muan të Koresë së Jugut. Autoritetet po hetojnë edhe rolin e strukturës prej betoni, e cila ndodhej 250 metra nga fundi i pistës.

Eksperti i sigurisë ajrore, David Learmount, mendon se shumica e pasagjerëve do të kishin mbijetuar nëse muri nuk do të kishte qenë aty. Piloti njoftoi se aeroplani ishte përplasur me zogj dhe më pas anuloi uljen fillestare, duke kërkuar leje për t’u ulur nga drejtimi i kundërt, shkruan bbc.

Aeroplani u ul në një pistë prej 2800 metrash, dhe duket se ulja u bë pa përdorur rrotat. Learmount e vlerësoi uljen mbi trupin e aeroplanit si më të mirën e mundshme dhe vuri në dukje se aeroplani nuk pësoi dëme të mëdha ndërsa rrëshqiste mbi pistë.

Lexo po ashtu Tragjedia në Korenë e Jugut e përshkruar me foto

“Arsyeja pse kaq shumë njerëz humbën jetën nuk është vetëm ulja, por përplasja e aeroplanit me një pengesë shumë të fortë menjëherë pas pistës”, deklaroi ai.

Me këtë qëndrim u pajtua edhe Ross Aimer, drejtori ekzekutiv i kompanisë amerikane Aero Consulting Aero “fatkeqësisht, kjo është arsyeja pse pothuajse të gjithë humbën jetën – ata u përplasën drejtpërdrejt me një strukturë betoni që nuk duhej të ishte aty”.

Piloti i linjës ajrore gjermane Lufthansa, Christian Beckert, gjithashtu e konsideroi të pazakontë praninë e një strukture betoni në fund të pistës. Ai tha se zakonisht nuk duhet të ketë diçka të tillë në fund të një piste aeroporti.

Megjithatë, sipas agjencisë koreano-jugore të lajmeve Yonhap, struktura prej betoni përmbante një sistem navigimi të njohur si lokalizues, i cili ndihmon gjatë uljes së aeroplanëve. Ai ishte katër metra i lartë për të siguruar funksionimin e tij të saktë.

Ministria e Transportit e Koresë së Jugut njoftoi se aeroporte të tjera në vend dhe disa aeroporte ndërkombëtare kanë pajisje të instaluara në struktura betoni. Megjithatë, ata thanë se do të shqyrtojnë nëse kjo strukturë duhej të ishte ndërtuar me materiale më të lehta dhe të thyeshme në rast përplasjeje.

Chris Kingswood, pilot me 48 vite përvojë, që ka drejtuar të njëjtin avion të përfshirë në aksident – një Boeing 737 – shtoi se “pengesat brenda një distance të caktuar nga pista duhet të jenë të thyeshme, që do të thotë se duhet të thyhen gjatë përplasjes me një aeroplan. Është e pazakontë që kjo pengesë të ishte kaq e fortë. Për sa di, aeroplani po lëvizte me shpejtësi të madhe dhe pasi preku pistën, ishte e qartë që do të kalonte shumë përtej saj”.

Ai vuri në dukje gjithashtu se avionët nuk janë struktura të forta – ata janë të lehtë për të qenë efikasë gjatë fluturimit.

“Faktikisht, aeroplanët nuk janë projektuar për të lëvizur me shpejtësi të madhe mbi trupin e tyre, kështu që përplasja me ndonjë strukturë mund të shkaktojë shpërbërjen e trupit dhe pastaj katastrofën. Karburanti mbahet në krahët e aeroplanit, kështu që kur krahu dëmtohet, ekziston një potencial i madh për shpërthim zjarri. Prandaj, nuk është e pamundur që rezultati të kishte qenë ndryshe nëse struktura nuk do të kishte qenë aty”, shtoi ai.

Lexo po ashtu Aksidentet më të mëdha ajrore që ndodhën gjatë vitit 2024

Kingswood u shpreh i habitur që aeroporti nuk përmbushte të gjitha standardet. Ai dyshon se një pengesë e tillë ekziston në ndonjë aeroport tjetër ndërkombëtar.

Nga ana tjetër, një ish-pilot dhe drejtor ekzekutiv i kompanisë amerikane Safety Operating Systems pretendon se pista e aeroportit koreano-jugor i plotëson të gjitha standardet, që do të thotë se struktura e fortë ndodhej të paktën 300 metra nga fundi i pistës.

Megjithatë, në manualin e këtij viti për Aeroportin Ndërkombëtar të Muan thuhet se struktura prej betoni është shumë afër fundin të pistës. Për këtë arsye, është rekomanduar një rishikim i vendndodhjes së saj.

Drejtori i përgjithshëm për menaxhimin e aeroporteve koreano-jugore, Kim Hong-rak, njoftoi se do të rishikohen rregulloret dhe zbatimi i tyre.

Analistja e aviacionit Sally Gethin ngriti pyetjen nëse piloti ishte në dijeni të pranisë së strukturës prej betoni në fund të pistës, duke pasur parasysh se avioni po afrohej nga drejtimi i kundërt.

Drejtori i linjës ajrore Jeju Air, Kim Yi-bae, nuk iu përgjigj drejtpërdrejt pyetjes nëse struktura prej betoni ishte shkaku i katastrofës. /Telegrafi/