“Festivali i Teatrit të Shkollave të Mesme” – bashkon rininë nga Gjilani, Kamenica dhe Presheva

Me datat 18, 19 dhe 20 dhjetor 2024, Teatri i Qytetit të Gjilanit do të organizojë Festivalin e Teatrit të Shkollave të Mesme, një ngjarje që bashkon komunitetet përmes artit.

Sipas një njoftimi për media, ky festival do të prezantoj shfaqje teatrale të përgatitura nga nxënësit që kanë ndjekur trajnime dy mujore me trajnerë profesionistë të teatrit.

“Ky festival, që i bashkon pesë shkolla të mesme nga qyteti i Gjilanit dhe komunat e Kamenicës dhe Preshevës, do të shfaqë shfaqje teatrale të përgatitura nga nxënësit, të cilët kanë kaluar dy muaj trajnime intensive me trajnerë profesionistë të teatrit”, thuhet në njoftim.

Në njoftim theksohet se pjesëmarrja në një festival të tillë është një përvojë unike për nxënësit dhe publikun.

“Pjesëmarrja në një festival teatri si ky nuk është vetëm një mundësi për nxënësit që të shfaqin aftësitë e tyre artistike, por gjithashtu një mundësi për të mësuar dhe kuptuar thelbin e artit teatral, përfshirë proceset krijuese që ndodhin prapa skenës”, theksohet tutje.

Gjatë trajnimeve, nxënësit kanë pasur mundësinë të mësojnë për aspekte të ndryshme të teatrit, si regjia, skenografia, kostumografia, muzika, koreografia, dizajni i dritave dhe rekuizitat.

“Ata janë mundësuar të provojnë kostumet që do të përdoren në shfaqjet e festivalit, duke përjetuar ndjesinë e transformimit dhe ndikimin e kostumeve dhe grimit në karakteret e tyre, si dhe në atmosferën që krijohet në skenë”, thuhet më tej në njoftim.

Risia e këtij edicioni qëndron në përfshirjen e shkollave nga Kamenica dhe Presheva, duke nxitur bashkëpunimin dhe integrimin e rinisë nga këto tri komuna.

“Ky festival do të shërbejë si një urë lidhëse mes nxënësve dhe mësuesve, si dhe si një mundësi për forcimin e marrëdhënieve ndërmjet institucioneve edukative në këto zona. Nëpërmjet artit dhe kulturës, festivali promovon një mesazh të fuqishëm për përfshirje dhe unitet ndërmjet rinisë nga tri komuna të ndryshme”, thuhet në përfundim. /Telegrafi/