Llogaritë zyrtare të Abdixhikut, Kica-Xhelilit dhe Gurit cak i sulmeve online – LDK paralajmëron veprime ligjore

Lidhja Demokratike e Kosovës, ka njoftuar se kryetarit të këtij subjekti Lumir Abdixhikut dhe disa prej anëtarëve të LDK-së, u janë sulmuar llogaritë zyrtare në rrjetet sociale.

“Lidhja Demokratike e Kosovës njofton opinionin publik dhe gjithë qytetarët se nga dje, llogaritë zyrtare të Instagramit të LDK-së, kryetarit Lumir Abdixhiku, nënkryetares Doarsa Kica Xhelili dhe kryetarit të Forumit të Rinisë, Paris Gurit si dhe disa llogarive të tjera të kandidatëve për deputetë, kanë qenë të sulmuara”, thuhet në njoftim.

LDK ka theksuar se këto llogari janë shënjestruar qëllimisht dhe në mënyrë të koordinuar, me qëllim dëmtimin e lirisë së shprehjes dhe ndërprerjen e procesit demokratik në prag të zgjedhjeve të ardhshme.

“Sa për informacion ne, kemi ndërmarrë masa të menjëhershme. Mbrëmë vonë, informuam zyrtarisht Meta-n për këtë aktivitet të pazakontë, duke ofruar të gjitha detajet e nevojshme dhe duke kërkuar mbështetjen e tyre për të adresuar çështjen”, thuhet tutje në njoftim.

LDK shton se do të ndërmarrim të gjitha veprimet e nevojshme ligjore për të zbuluar përgjegjësit dhe për të mbrojtur lirinë e shprehjes dhe demokracinë. /Telegrafi/