EC Ma Ndryshe shënon Ditën Ndërkombëtare të PAK-ve me nxënësit e klasave gjithëpërfshirëse, promovohet kujdesi për trashëgiminë kulturore dhe mjedisin  

Me rastin e shënimit të 3 dhjetorit – Ditës Ndërkombëtare të Personave me Aftësi të Kufizuara, EC Ma Ndryshe ka realizuar aktivitete me nxënësit e klasave gjithëpërfshirëse në shkollat “Emin Duraku” dhe “Gani Saramati” në Prizren.

Sipas njoftimit, për këta nxënës është mundësuar shëtitja virtuale në 3D nëpër Muzeun Arkeologjik të Rajonit të Prizrenit dhe në Muzeun e Lidhjes së Prizrenit, duke u mundësuar njohjen me vlerat e trashëgimisë kulturore të ekspozuara në këto institucione.

Krahas kësaj, sipas njoftimit, është shpërndarë edhe versioni në tavolinë i lojës mjedisore për nxënësit e klasave gjithpërfshirëse në të dy shkollat.

Qëllimi i kësaj loje është rritja e ndërgjegjësimit dhe njohurive të lojtarëve për vlerat natyrore të Kosovës, por edhe për problemet mjedisore që kërcënojnë këto pasuri, si kontribut për zhvillimin e qëndrueshëm në Kosovë.

“Në këtë kuadër, EC-i do të vijoj angazhimin e kahershëm për të rritur përfshirjen, pjesëmarrjen dhe përfaqësimin e PAK-ve në vendimmarrje, me qëllim që ata të formësojnë në mënyrë aktive kushtet e jetës së tyre, bashkë me avokimin tek institucionet për zbatimin e parimeve të gjithëpërfshirjes për zhvillim të qëndrueshëm”, thuhet në njoftimin e kësaj organizate joqeveritare. /Telegrafi/