Përplasje në Kuvendin e Ferizajt, opozita lëshon mbledhjen

Mbledhja e së mërkurës në Kuvendin Komunal të Ferizajt, ka vazhduar me kritika e përplasje në mes të pozitës e opozitës. Kuvendarët e subjekteve opozitare, Lëvizja Vetëvendosje dhe Lidhja Demokratike e Kosovës në Ferizaj kanë lëshuar mbledhjen e rregullt, me arsyetim se pozita nuk i përkrahi propozimet e tyre për të debatuar në një pikë të veçantë rreth gjendjes në shkolla.

Opozita ka kritikuar komunën se ende nuk i ka furnizuar shkollat me dru, andaj sipas opozitës shkaku i kësaj ka shkolla që nuk e kanë mbajtur mësimin në javën e kaluar.

Ndërkaq, drejtori i Arsimit në Komunën e Ferizajt, Afrim Llabjani, ditë më parë në një intervistë për telegrafin, pati sqaruar se shkollat do të furnizohen me dru pasi të shqyrtohej një ankesë e një operatori ekonomik.

Amir Rexhepi, kuvendar nga Lëvizja Vetëvendosje, ka kërkuar të diskutohet rreth gjendjes së shkollave pasi që sipas tij, në javën e kaluar Gjimnazi “Shaban Hashani’” e ka ndërprerë mësimin shkaku i mungesës së ngrohjes.

“Propozoj një pikë të rendit të ditës lidhur me gjendjen e shkollave dhe kërkoj të mbështetet nga të gjithë kuvendarët që të mbështetet ky propozim”, ka thënë Rexhepi.

Kryesuesi i Kuvendit Xhavit Zariqi, menjëherë e vendosi në votim këtë propozim por ai nuk i mori votat e mjaftueshme.

“Propozimi i kuvendarit Rexhepi me 15 vota pro dhe me 17 kundër nuk kalon”, ka thënë Zariqi.

Ndërkaq, Flamur Istrefi, shef i grupit të kuvendarëve nga radhët e LDK-së, ka thënë se sallën e liruan me arsyetimin se propozimi i kuvendarit Rexhepi për të debatuar rreth gjendjes së shkollave, nuk po përkrahet nga pozita.

“Qëllimi ishte të kemi informata më konkrete lidhur me lëndët djegëse që për momentin nuk ka nëpër shkolla dhe fëmijët po janë të obliguar ta vazhdojnë mësimin në këtë kohë të ftohtë, pa ngrohje. Donim të diskutonim dhe në fund të japim propozimet tona. Duke e parë që kanë dështuar në menaxhim me objektet shkollore, gjendjen e rendë në të cilën ndodhen donim të propozonim si grup parlamentar që të behej një zgjidhje duke parë mundësinë edhe të tenderëve me negocim si zgjidhje e fundit”, ka thënë Istrefi.

Kujtojmë që ditë më parë komuna e Ferizajt, pasi ka pranuar ankesë nga një operator ekonomik, ka pezulluar përkohësisht tenderin e druve për ngrohje të shkollave. Ani pse kjo ankesë kishte shkuar nga një operator që ishte më i shtrenjtë në këtë tender, komuna e ka pezulluar përkohësisht për ta shqyrtuar atë. Pezullimi i tenderit është bërë për shkak të transparencës nga ana e drejtorisë së arsimit.

Afrim Llabjani drejtor i Arsimit në këtë komunë, në një intervistë për telegrafin, pak ditë më parë, pati treguar lidhur me gjendjen e druve në shkolla, teksa ka njoftuar se nuk ka hapësirë për t’u shqetësuar.

“Ne si komunë me kohë i kemi zhvilluar procedurat për furnizim të shkollave me dru, mirëpo herën e parë është anuluar tenderi shkaku i papërgjegjësive të operatorëve ekonomik. Kurse tash pasi janë finalizuar procedurat ka ardhur një ankesë nga një operator ekonomik edhe pse ai ishte më i shtrenjtë se operatori fitues”, ka thënë Llabjani.