Shqetësimet artistike për shembjen e botës tok me muzikën e përrallat plotësojnë programin në Prizren Fest

Programi i shfaqjeve teatrore në edicionin e tretë të “Prizren Fest” ka njoftuar publikun me shqetësimet artistike për shembjen e botës, pastaj për ekuilibrin mes partnerëve e ndikimin e muzikës, derisa për më të vegjlit është rezervuar tregimi i veçantë i përrallave.

Krizat e njëpasnjëshme në arenën botërore dhe ndikimet e tyre tek njerëzit e rëndomtë shpalosen në dramën “Katastrofa” nga Greqia, që është shfaqur në skenën në Kino Lumbardh.

Kjo shfaqje sipas njoftimit të organizatorëve ka sjellë kaos që në fillimin e saj, duke bërë edhe publikun pjesë të lojës, raporton Telegrafi.

“Gjashtë qytetarë të kësaj bote në kolaps, disa prej tyre artistë, të tjerët jo, por që të gjithë ndajnë një ankth të përbashkët për të ardhmen, e gjejnë veten të bllokuar në një skenë që dyfishohet edhe si një strehë, duke kërkuar “Zgjidhjen e Madhe” që do të na shpëtojë nga Katastrofa e afërt”, thuhet në njoftim.

Ndërsa shfaqja e bazuar në vallëzim, “Music in Between” nga Italia përmes kërcimit, sipas njoftimit ka përçuar energji të mirë tek publiku i pranishëm në Kejin e Sinan Pashës. Kjo shfaqje ka trajtuar marrëdhëniet në çift përkatësisht ekuilibrin ndërmjet partnerëve, raporton Telegrafi.

“Muzika si art informal është ajo që mbush boshllëkun tonë të pacaktuar, duke gjeneruar emocione, energji, intensitet dhe padyshim imagjinatë, sikurse ndodhi edhe në shfaqjen ‘Music in Between’”, thuhet në njoftim.

Ndërkaq “Përralla palidhje”, produksion i Teatrit “Dodona” ka qenë shfaqja e fundit për fëmijë në kuadër të Prizren Fest Kids.

“Aktorët, në tollovinë e jetës së një kthine të vogël, mundohen t’i tregojnë fëmijëve përrallën e vet, por ata shpesh pengohen në mënyrë qesharake. Secila përrallë tregohet në mënyrën e vet me kukullat e krijuara me mjetet të cilat gjinden aty”, thuhet në njoftim.

Edicioni i tretë i Prizren Fest vazhdon me programin e shfaqjeve deri më 28 korrik. /Telegrafi/