Kryevepra subversive e Kubrick hap DokuFestin, derisa filmi i ri i shkurtër i Karahodës e mbyll edicionin e sivjetmë

Filmi satirik i Stanley Kubrick mbi ankthin e Luftës së Ftohtë sivjet do të hapë programin e filmave në Festivalin Ndërkombëtar të Filmit Dokumentar dhe të Shkurtër, DokuFest, derisa filmi i fundit i regjisorit prizrenas, Samir Karahoda do ta mbyllë këtë edicion më 10 gusht.

DokuFest ka njoftuar se filmi “Dr. Strangelove or: How I Learned to Stop Worrying and Love the Bomb”, nga regjisori legjendar Stanley Kubrick do të hapë festivalin të premten, më 2 gusht, në kinemanë Lumbardhi pas ceremonisë së hapjes, raporton Telegrafi.

“Interpretimi komik i Stanley Kubrick mbi ankthin e Luftës së Ftohtë është një nga satirat më të ashpra të marrëzisë njerëzore që ka dalë ndonjëherë nga Hollywood-i. Aktori i jashtëzakonshëm Peter Sellers luan tre role krejtësisht të ndryshme: Kapitenin e Forcave Ajrore Mbretërore, Lionel Mandrake, që përpiqet me çdo kusht të ndalojë një sulm bërthamor ndaj BRSS-së, të urdhëruar nga një gjeneral i krisur (Sterling Hayden); Presidentin amerikan të pafuqishëm dhe gjithmonë të hutuar, Merkin Muffley, që duhet t’i japë lajmin e keq kryeministrit sovjetik; dhe vetë Strangelove-in, një këshilltar presidencial në karrocë dhe me një të kaluar naziste. Duke gjetur humor në pothuajse çdo situatë të paimagjinueshme, ’Dr. Strangelove or: How I Learned to Stop Worrying and Love the Bomb’ është një kryevepër subversive që zyrtarisht e shpalli Kubrick-un si një stilist të paarritshëm dhe ironist të zymtë”, thuhet në njoftimin e DokuFestit.

Ndërsa maratona e filmave në edicionin e sivjetmë do të përmbyllet me filmin “Rrugës” të Samir Karahodës, krijim ky që pati premierën botërore në Festivalin e Filmit në Cannes, në maj të këtij viti, raporton Telegrafi.

“Pas ceremonisë së ndarjes së çmimeve, festivali do të mbyllet me shfaqjen e filmit ‘Rrugës’, filmit të shkurtër më të ri të kineastit të mirënjohur kosovar Samir Karahoda. Të frymëzuar nga ngjarje të vërteta, një regjisor dhe djali i tij, Miron (13), bashkëpunojnë për një skenar që gërsheton përvojat e tyre personale dhe elementet autobiografike me shqetësime më të mëdha për vendin e tyre. Teksa nisen për në aeroport për të marrë një dhuratë nga kumbari i djalit, ata ndeshen me pengesa burokratike që lënë të kuptohet për stagnimin e përparimit politik dhe shoqëror në atdheun e tyre. Ky udhëtim i shkurtër evoluon në një eksplorim të thellë të lidhjes së tyre në sfondin e sfidave shoqërore dhe pasigurisë që lind mbi të ardhmen e tyre”, thuhet në njoftimin e DokuFestit.

Edicioni i sivjetmë i DokuFestit mbahet nga 2 deri më 10 gusht në Prizren. /Telegrafi/