Eko-Klubet frymëzohen për aktivizmin mjedisor përmes filmit

Dita Botërore e Mjedisit të mërkurën është shënuar në Prizren me shfaqjen e një dokumentari për aktivizmin mjedisor në “DokuKino”.

Në këtë aktivitet të realizuar nga OJQ “EC Ma Ndryshe” dhe DokuFest kanë marrë pjesë Eko-Klubet e shkollave të mesme të rajonit të Jugut (nga komunat Prizren, Rahovec, Malishevë dhe Mamushë).

“Shfaqja e filmit është pasuar me diskutim në mes anëtarëve të Eko-Klubeve mbi çështjet mjedisore dhe urgjencën për veprim lidhur me ndryshimet klimatike, tema këto të trajtuara edhe në dokumentar”, thuhet në njoftimin e publikuar nga “EC Ma Ndryshe”, raporton Telegrafi.

Sipas komunikatës, të rinjtë janë ndërgjegjësuar për domosdoshmërinë e një reagimi të shpejtë sikurse edhe për rëndësinë e pjesëmarrjes së tyre në proceset avokuese për të adresuar ndryshimet klimatike dhe mbrojtjen e mjedisit, si çështje të rëndësishme për të ardhmen e planetit dhe brezave të ardhshëm.

“Përveç njohurive të reja dhe nxitjes së aktivizimit të nxënësve për të ofruar zgjidhje të ndryshme mbi këto çështje, ky aktivitetet po ashtu kontribuoi edhe për shoqërimin e anëtarëve të Eko-Klubeve nga komunat e ndryshme, duke ndarë mes vete përvojat për aktivitetet mjedisore që ata realizojnë në shkollat e tyre”, përfundon njoftimi i “EC Ma Ndryshe”.