Parregullsi në financimin e partive politike në Maqedoninë e Veriut

Partitë politike në vend vazhdojnë të shënojnë parregullsi në financimet e tyre. Edhe në raportin për vitin 2021, Enti shtetëror për revizion ka konstatuar parregullsi në mbledhjen e fondeve nga partitë politike. Nga Revizioni thonë se shprehin rezerva në lidhje me tregimin objektiv dhe të vërtetë nga ana e partive për raportet financiare dhe për përputhshmërinë e transaksioneve financiare me rregulloren relevante ligjore, udhëzimet dhe politikat e vendosura. Pas përfundimit të raporteve, thuhet se në BDI bëhen pagesa të anëtarësisë me shuma më të mëdha se që e lejon ligji, ndërsa për një pjesë të mjeteve nuk ka tregues të posaçëm për secilën pagesë.

Probleme të ngjashme financiare Revizioni ka konstatuar edhe për LSDM-në, ku thekson se mënyra e pagesës së anëtarësive nuk lejon kontroll të plotë të pagesave. Për partinë e Dimitar Kovaçevskit theksohet se për një pjesë e objekteve të ndërtuara të partisë nuk është zgjidhur statusi i pronësisë dhe të njëjtat nuk janë vendosur në evidencë.

Enti thekson se në OBRM-PDUKM nuk mund të bëjnë revizion të plotë për shkak të një pjese të pronës e cila i është ngrirë nga organet kompetente. Andaj i rekomandon udhëheqjes së partisë që pas përfundimit të procedurave të ngritura në organet kompetente menjëherë ta paraqesin pronën e tyre tek Revizioni.

Ndërsa për Alternativën konstaton se vazhdon të udhëheq financat në bazë të ligjit për Organizatë jo përfituese. Nga Enti thonë se Alternativa e ka për obligim që ta zbatojnë kapitullin e ndryshimeve të modifikuara afariste.

Pas publikimit të raporteve për katër partitë e lartë përmendura, nga Enti për Revizion thonë se vendi shënon histori në parregullsinë financiare të partive të cilat qarkullojnë miliona euro. Andaj rekomandojnë që shteti ti rregullojë mënyrat se si partitë politike mbledhin para nga anëtarësia dhe donacionet.

“Shteti duhet ti rregullojë mënyrat aktuale se si partitë politike mbledhin para nga anëtarësimet dhe donacionet, për shkak se rregullat aktuale nuk mundësojnë kontrolle të hyrjeve të parave joligjore dhe mënyra se si bëhen nuk është mjaftueshëm transparente”, thanë nga Enti shtetëror për Revizion.

Enti Shtetëror për revizion çdo vit has në parregullsi të financimit të partive politike dhe fondeve të cilat ata i grumbullojnë. Për parregullsitë ka alarmuar dhe OSBE/ODIHR-ja e cila kërkon ndryshime në Ligj për financimin e partive politike gjatë fushatave zgjedhore. /Alsat/