Dhoma e hotelit në Tibet kishte një aromë të pakëndshme, turisti kërkoi të zhvendosej – pas dy ditësh zbuloi se kishte fjetur mbi një kufomë

Kur një turist në një hotel tibetian ndjeu një erë të pakëndshme në dhomën e tij dhe kërkoi të zhvendosej, ai nuk mund ta merrte me mend se çfarë ishte.

Udhëtari kaloi gjysmë dite në dhomë duke pyetur veten se nga vinte era, në fillim dyshoi për furrën e bukës në katin e parë, madje edhe për këmbët e veta.

Por më vonë u informua se era vinte nga një trup i pajetë nën shtrat, transmeton Telegrafi.

Turisti – i identifikuar vetëm si Zhang – u regjistrua në një hotel të njohur për influencuesit në Lhasa më 20 prill.

Por vetëm dy ditë më vonë – pasi ishte zhvendosur në një dhomë tjetër, mësoi burimin e erës, kur një grup oficerësh policie e thirrën përsëri në dhomën ku kishte qenë më parë.

“I pyeta se çfarë ndodhi dhe më thanë se dikush kishte vdekur. Prandaj i pyeta se ku. Ata thanë nën shtratin tim”, tha ai për Shangyou News.

Policia i tha atij se kishin hapur një hetim për vrasje, por ai nuk ishte i dyshuar sepse trupi kishte qenë i shtrirë nën shtrat për ditë para se ai të arrinte.

Rasti u raportua gjerësisht në të gjithë Kinën, me shumë media shtetërore të lajmeve që publikuan video të arrestimit të dyshuarit në një tren të nisur për në Lanzhou, një qytet rreth 2,000 kilometra larg Tibetit.

Zhang tha se u largua nga Tibeti sapo ndihmoi policinë në hetim. Por ai tha se është ende në shok dhe që nga ajo kohë ka luftuar për të fjetur. /Telegrafi/